Бруто домашниот производ (БДП) падна за четири отсто на Западниот Брег и Појасот Газа во првиот месец од војната меѓу Израел и Хамас, а повеќе од 400.000 луѓе беа осиромашени, се вели во извештајот на ОН за последиците од последниот конфликт и целосната опсада на палестинската територија.
Вакви економски последици не беа забележани ниту во конфликтите во Сирија и Украина, ниту во некоја претходна војна меѓу Израел и Хамас.
Повеќе од две третини од 2,3 милиони жители на Газа ги напуштија своите домови откако Израел започна жестоки воздушни напади, а потоа и копнени операции, ветувајќи дека ќе ја уништи исламистичката екстремистичка група Хамас, која владее со територијата.
На 7 октомври, Хамас ненадејно го нападна југот на Израел и со поддршка на ракетни напади беа убиени повеќе од 1.400 луѓе, главно цивили, а околу 240 заложници беа одведени во Газа.
Во израелското бомбардирање на Појасот Газа и копнената операција што започна подоцна, според податоците на локалното министерство загинале над 10.800 луѓе, меѓу кои и околу 4.400 деца.
Проценката на Програмата за развој на ОН и Економската и социјалната комисија на ОН за Западна Азија е првиот извештај на едно светско тело што ги покажува разорните последици од војната, особено за Палестинците.
Доколку војната продолжи, ОН предвидуваат дека палестинскиот БДП, кој пред почетокот на војната изнесуваше 20,4 милијарди долари, ќе се намали за 8,4 отсто, што е загуба од 1,7 милијарди.
Ако продолжи и трет месец, БДП ќе се намали за 12 проценти со загуби од 2,5 милијарди и повеќе од 600.000 луѓе ќе осиромашат.
Помошникот на генералниот секретар на Програмата за развој на ОН, Абдала ал-Дардари рече дека загубата од 12 отсто на крајот на годината би била без преседан.
Тој ја спореди загубата на сириската економија со еден процент од БДП месечно во екот на конфликтот.
Украина изгуби 30 отсто од својот БДП за година и пол, во просек 1,6 отсто месечно.
Во јануари невработеноста во Газа веќе беше околу 46 отсто, три и пол пати поголема отколку на Западниот Брег, каде што беше 13 отсто.
Стотици илјади работни места се уништени од почетокот на војната.
Функционирањето на економијата на Западниот Брег, кој сочинува 82 отсто од палестинскиот БДП, е значително нарушен во време кога треба да се берат маслинки и агруми, а туристичката сезона практично пропадна.
Земјоделството и туризмот сочинуваат 40 отсто од БДП на Западниот Брег.
Покрај тоа, нарушена е трговијата и трансферот на пари од даноците и давачките што Израел ги собира за палестинската управа на Западниот Брег.
Нивото на уништување во Газа е незамисливо и без преседан, изјави Рола Дашти, извршен секретар на Економската комисија.
До 3 ноември целосно се уништени 35.000 станбени единици, а делумно се оштетени околу 220.000, што е 45 отсто од уништените и оштетените станови.
Ако вака продолжи, мнозинството жители на Газа нема да имаат дом.
Дури и ако војната сега престане, луѓето ќе бидат раселени долго време со сите хуманитарни, економски и безбедносни последици, предупреди Ал-Дардари, додавајќи дека се што е постигнато пред војната може да биде обратно и да се врати на нивото од 2002 година.
