Најважните европски берзански индекси утрово беа во благ плус, со што го продолжија позитивниот тренд по минатонеделниот силен раст, а акцијата на Ryanair се истакна како добитник откако авиокомпанијата објави рекордна добивка.
Паневропскиот индекс Stoxx 600 порасна за 0,21 отсто околу 9:30 часот, откако минатата недела скокна за повеќе од три отсто, бидејќи инвеститорите беа охрабрени од добрата заработка на компаниите и надежта за крај на циклусот на заострување на каматните стапки од водечките централни банки .
Истовремено, франкфуртски DAX зајакна за 0,11 отсто, на 15.205 поени, лондонскиот FTSE индекс за 0,12 отсто, на 7.426 поени, а париски CAC за 0,15 отсто, на 7.057 поени.
Во однос на растот на цените, предничат акциите на туристичките компании, со просечен раст од 1,3 отсто. За тоа придонесе и скокот на цената на акцијата на ирската авиокомпанија Ryanair за 5,8 отсто, на највисокото ниво во последниот месец.
Имено, таа најголема европска авиокомпанија, мерено според бројот на превезени патници, утринава извести дека во првите шест месеци од својата фискална година, која трае од септември, остварила добивка од 2,18 милијарди евра, 59 отсто повеќе од лани, и дека годинава очекува рекордна добивка, која се движи од 1,85 до 2,05 милијарди евра.
Дополнително, објави дека планира да исплати дивиденда за прв пат во својата историја, во износ од 400 милиони евра, во две транши, 200 милиони во февруари следната година и 200 милиони во септември. Година потоа објави дека ќе исплати приближно 25 отсто од остварената нето добивка.
Значително се зголеми и цената на акцијата на Телеком Италија, за 2 отсто, по објавата дека е одобрена продажбата на неговата фиксна мрежа на американската приватна компанија ККР за 19 милијарди евра.
На токиската берза индексот Nikkei денеска порасна за 2,37 отсто, на 32.708 поени.
