Во 2022-ра година се гледа целосно закрепнување на туризмот во Европската унија, што се однесува до леглата за ноќевање, покажуваат податоците на Евростат објавени денеска. Во текот на годината се регистрирани вкупно 28,9 милиони легла во над 620 илјади места за сместување.
По одржливиот раст помеѓу 2009-та и 2019-та година, туризмот во Европа беше меѓу најпогодените сектори од пандемијата Ковид-19 во 2020-та година, според Евростат. Бројот на ноќевања во Унијата тогаш се преполови во споредба со 2019-та година. Знаци на закрепнување се забележани во 2021-ва година, кога бројот на ноќевања достигнува речиси две третини од нивото пред пандемијата. Нагорниот тренд продолжува и во 2022-ра година, кога достигнува 96% од својата состојба во 2019-та година, а првите шест месеци од тековната година покажуваат дека ноќевањата се дури 6,3% повеќе во споредба со истиот период пред пандемијата, достигнувајќи рекордни 1,2 милијарди ноќевања за првата половина од годината.
Во изминатата 2022-ра година е забележан пораст на основицата на леглата за 3% во однос на 2020-та година и зголемување на бројот на сместувачките места за 4%. Слаб раст е забележан дури и во споредба со периодот пред пандемијата – од 1% за двата показатели.
Нешто повеќе од една третина од вкупниот капацитет на кревети се наоѓа во Италија и Франција (по 18%), а потоа следат Шпанија (13%) и Германија (12%).
Поголемиот дел од туристите во одделни земји доаѓаат од други земји членки на унијата – 65% од ноќевањата. Според овој показател, има разлики во однос на периодот пред пандемијата, кога три четвртини од сите туристички ноќевања биле гости од земјите на ЕУ. Ноќевањата на туристите од другите европски земји лани биле 22 отсто од вкупниот број и говорат за раст во однос на 2021-ва година.
Евростат објави дека по пандемијата е зголемен бројот на ноќевања на туристи од земји надвор од Европската унија и тие сочинуваат 13% од вкупниот број ноќевања минатата година, додека во 2021-ва година биле 8%.
