Цените на нафтата денеска се искачија над 93 долари на меѓународните пазари, бидејќи трговците се загрижени поради сигналите од Израел за неизбежна инвазија на блокираната палестинска енклава Газа, која би можела да го прошири конфликтот низ Блискиот Исток и да ги загрози резервите.
На лондонскиот пазар цената на барелот по пладне беше повисока за 88 центи од вчерашното затворање на трговијата и изнесуваше 93,26 долари. На американскиот пазар барелот со испораки во ноември се тргуваше за 95 центи повисоко од 90,32 долари. Поактивно се тргуваше со барели со датум на испорака во декември, по цена од 89,26 долари.
Цените остро осцилираа вчера бидејќи загриженоста за снабдување во врска со конфликтот меѓу Израел и палестинската милитантна група Хамас беше накратко се стиша од најавата дека САД ќе ги олеснат санкциите кон Венецуела и ќе дозволат нејзината нафта да се врати на светските пазари.
Вашингтон издаде шестмесечна лиценца за трансакции со венецуелскиот енергетски сектор откако владата во Каракас и опозицијата се договорија за избори во 2024 година. Но, на Венецуела ќе и треба време да го зголеми производството, поради слабите инвестиции во овој сектор.
Кон крајот на годината, повторно преовлада загриженоста за снабдувањето од Блискиот Исток, по бранот протести во арапските земји, Иран и Турција поради нападот на болницата во блокираната палестинска енклава Газа, во кој загинаа речиси 500 луѓе.
Тел Авив најави копнена инвазија на Газа, а израелскиот министер за одбрана Јоав Галант им рече на војниците во близина на границата во четвртокот дека наскоро ќе ја видат палестинската енклава „од внатре“, што укажува на неизбежна воена операција. Стравот од конфликт дополнително беше поттикнат од најавата на Пентагон дека САД пресретнале проектили истрелани од Јемен кон Израел над Црвеното Море.
„Цените на нафтата значително пораснаа од вчера поради индикации за неизбежна израелска копнена офанзива во Појасот Газа. Во Лондон, барелот се врати на 93 долари. Сепак, ситуацијата со понудата досега не е променета“, пишуваат аналитичарите на Комерцбанк во белешката за петок.
Цените се поддржани и од проценките за поголем недостиг на понудата во четвртиот квартал, откако водечките производители Саудиска Арабија и Русија одлучија да пласираат помалку барели на пазарот до крајот на годината. Ниските залихи, особено во САД, се дополнителен поттик за нив.
Вашингтон планира да купи шест милиони барели сирова нафта во декември и јануари за да ги пополни исцрпените стратешки резерви, соопшти вчера Министерството за енергетика. Организацијата на земјите извознички на нафта (ОПЕК) одделно извести дека барел од нафтената кошница на нејзините членки во четвртокот падна за 83 центи на 93,63 долари.
