Иран во саботата во објава на социјалните мрежи предупреди дека ситуацијата би можела да излезе од контрола со „далекосежни последици“ доколку не се запрат „воените злосторства и геноцидот“ на Израел.
Објавата на мрежата X од страна на мисијата на ОН на Иран дојде откако американската веб-страница Аксиос објави дека Техеран го предупредил Израел – во порака испратена преку ОН – дека ќе мора да одговори доколку Израел изврши генерален копнеен напад врз Појасот Газа кој е под контрола на Хамас.
„Доколку воените злосторства и геноцидот на израелскиот апартхејд не се прекинат веднаш, ситуацијата може да излезе од контрола и да предизвика далекусежни последици – за што одговорноста ќе биде на ОН, Советот за безбедност и земјите што го водат Советот во ќорсокак“, објави иранската мисија во ОН.
Израел се подготви да изврши копнен напад врз Хамас кој има поддршка од Иран во Појасот Газа во саботата, откако им порача на Палестинците кои живеат во густо населената област да побегнат на југ кон затворената граница со Египет.
Израел вети дека ќе го уништи Хамас како одмазда за нападот на палестинската исламистичка група пред една недела. Хамас ги нападна израелските градови, убивајќи 1.300 луѓе и земајќи десетици заложници – најлошиот напад врз цивили во историјата на Израел.
Израелските авиони и артилерија веќе ја подложија Газа на најтешкото бомбардирање што некогаш го видела, ставајќи ја енклавата, дом на 2,3 милиони Палестинци, под целосна опсада. Властите во Газа соопштија дека се убиени повеќе од 2.200 луѓе.
Соединетите Држави работат на тоа да го задржат Иран од конфликтот, а пошироката меѓународна дипломатија има за цел да го спречи неговото ширење – особено во Либан – и да предизвика регионална војна.
Либанската, силно вооружена група Хезболах, поддржана од Иран, се судри со Израел преку либанската граница неколку пати во изминатата недела во најсмртоносните судири откако тие водеа едномесечна војна во 2006 година.
Претставникот на ОН за мир на Блискиот Исток, Тор Венесланд, се состана со иранскиот министер за надворешни работи Хосеин Амир-Абдолахиан во саботата во Бејрут, соопштија Обединетите нации.
Абдолахиан потоа се сретна со лидерот на Хамас Исмаил Ханије во Катар, објави телевизијата Ал Џезира.
Запрашан за извештајот на Аксиос, портпаролот на ОН, Стефан Дујарик, рече: „Сите состаноци (на Венесланд) беа да разговараат за дипломатските напори за ослободување на заложниците, обезбедување хуманитарен пристап и спречување на конфликтот да се прелее во поширокиот регион. Тоа ги вклучува неговите неодамнешни состаноци во Либан“.
Мисијата на Израел во Обединетите нации одби да го коментира извештајот на Аксиос или објавата на Иран на социјалните мрежи.
