На лондонскиот пазар цената на барелот по пладне беше повисока за 2,70 долари во однос на затворањето на тргувањето на крајот на минатата недела и изнесуваше 87,28 долари. Речиси за исто толку поскапе и цената на барелот на американскиот пазар, на 85,57 долари.
Крајот на минатата недела беше обележан со стравувања дека забрзаното темпо на вработување во САД во септември би можело да ја поттикне централната банка повторно да ги зголеми каматните стапки, што би значело послаб економски раст и побарувачка за енергетски производи.
Во понеделникот вниманието на трговците беше насочено кон нападот на палестинската вооружена група Хамас на израелска територија и одговорот на израелските вооружени сили. Конфликтот веќе однесе повеќе од илјада човечки животи и може да се прошири во целиот регион.
Односот на понудата и побарувачката остана ист, објаснува Тамас Варга од PVM, но „зголемените тензии на Блискиот Исток обично резултираат со повисоки цени на нафтата и тоа се случува сега“.
Ерупцијата на насилство може да ги загрози напорите на САД да посредува за зближување меѓу Саудиска Арабија и Израел и да ги нормализира саудиско-израелските односи нудејќи му на Ријад оружје за возврат.
Саудиските власти, наводно, во петокот ѝ рекле на Белата куќа дека се подготвени, како дел од договорот, да го зголемат производството следната година. Саудиска Арабија и Русија во моментов планираат да ја намалат понудата до крајот на годината за 1,3 милиони барели дневно.
Прашање е до кога ќе расте цената на нафтата во сегашните околности, велат аналитичарите на Сити.
Аналитичарите предупредуваат дека конфликтот го отвори и прашањето за можното учество на Иран.
„Доколку конфликтот го зафати Иран… до три отсто од глобалното снабдување со нафта е во ризик“, објаснува за Ројтерс енергетскиот аналитичар Саул Кавониќ.
Исто така, во понеделникот, Организацијата на земјите извознички на нафта (ОПЕК) ги зголеми своите проценки за среднорочна и долгорочна побарувачка на нафта. Тие проценуваат дека до 2045 година ќе достигне 116 милиони барели дневно, што ја зголеми минатогодишната проценка за 5,4 отсто.
До 2028 година побарувачката би требало да достигне 110,2 милиони барели дневно, нешто повеќе од претходно очекуваното.
Меѓународната агенција за енергија (ИЕА) проценува дека тој би можел да го достигне својот врв во оваа деценија.
Во посебен извештај, ОПЕК објави дека цената на барел од нафтената кошница на нејзините членки се намалила за 1,21 долари на 87,30 долари минатиот петок.
