Економијата на еврозоната најверојатно се намали во последниот квартал, според истражувањето кое покажа дека побарувачката паднала во септември со најбрзо темпо во речиси три години, бидејќи задолжените потрошувачи ги ограничиле трошоците во услови на зголемени стапки на задолжување и заеми по високи цени.
Конечниот композитен индекс на менаџери за набавка (PMI) од „S&P Global“, кој се смета за добар показател за вкупните економски услови, се искачи на 47,2 во септември од 46,7 во август, објави „Reuters“, но додаде:
„Во исто време, сепак, четврти месец по ред, овој индикатор беше под границата од 50 поени што го дели растот од контракцијата, иако беше пред прелиминарната проценка од 47,1 поен“.
Истражувањето од средата, исто така, покажа дека падот е на широка основа бидејќи, како и во август, производството падна и во услугите и во преработувачката индустрија.
Во меѓувреме, продажбата на мало во еврозоната падна повеќе од очекуваното во август, покажаа официјалните податоци, што укажува на послаба побарувачка на потрошувачите бидејќи инфлацијата остана висока.
„Падот на продажбата на мало во август и слабоста на конечните „PMI“ за септември се во согласност со нашиот став дека економијата на еврозоната ќе западне во рецесија во втората половина на 2023-та година“, рече Франциска Палмас од „Capital Economics“.
Активноста во германскиот услужен сектор порасна во септември, но во Франција индустријата се намали со најбрзо темпо во речиси три години, бидејќи падот на новите нарачки и извозниот бизнис влијаеше врз втората по големина економија во еврозоната.
Индустријата за услуги во Италија се намали втор месец по ред во септември, но шпанската покажа одредена отпорност и малку се прошири по падот во август.
Во Велика Британија, која е надвор од Европската унија, компаниите за услуги претрпеа помал пад отколку што првично се стравуваше, како одраз на изненадувачкиот пад на инфлацијата и одлуката на Банката на Англија да ги задржи каматните стапки на чекање, објави новинската агенција.
Во септември, композитниот индекс на нови нарачки во еврозоната, кој ја следи севкупната побарувачка, падна од 44,6 на 44,4, ниско ниво што не е забележано од ноември 2020-та година, кога светот сè уште беше во контрола на пандемијата Ковид-19.
Индексот „PMI“, кој ја покрива доминантната индустрија на услуги во блокот, остана под 50 втор месец, но сепак се искачи на 48,7 од 47,9. Очекувањата беа за 48,4.
Тоа доаѓа откако слично истражување во понеделникот покажа дека производствената активност остана заглавена во длабок и широк пад минатиот месец бидејќи побарувачката се намалува со темпо што ретко се надминува од собирањето на податоците во 1997-ма година.
Еден добар знак е тоа што минатиот месец компаниите од услужниот сектор го зголемија бројот на вработени со побрзо темпо отколку во август. Индексот на вработеност се искачи од 50,4 на 51,5.
„Услужниот сектор сè уште има висока побарувачка за работници. Всушност, компаниите од еврозоната додадоа персонал со побрзо темпо отколку во август. Ова е запрепастувачки со оглед на тоа што новиот бизнис стагнира. Еден предлог може да биде дека како што економските води се заматуваат, луѓето почнуваат да бараат работа, дозволувајќи им на компаниите да го пополнат долгогодишниот недостиг на персонал“, рече Сајрус де ла Рубија од Хамбургшката комерцијална банка.
