Русија ќе продолжи да ги намалува испораките на нафта на светските пазари за 300.000 барели дневно до крајот на декември.
Ова го изјави вицепремиерот на руската Влада, Александар Новак.
Според него, властите во ноември ќе одлучат дали дополнително ќе го намалат или зголемат производството, а истото прашање ќе го разгледа и Саудиска Арабија.
„Следниот месец ќе се изврши анализа на пазарот со цел да се донесе одлука за продлабочување на намалувањето или зголемување на производството на нафта“, рече Новак. Тој додаде дека дополнителните намалувања на производството се дизајнирани да ги зајакнат мерките што ги преземаат земјите од ОПЕК + за одржување на стабилноста и рамнотежата на нафтените пазари, пренесува Комерсант.
Саудиска Арабија, исто така, може да го разгледа обемот на дополнителното намалување на производството на нафта во ноември, објави тамошната новинска агенција SPA, цитирајќи извор во Министерството за енергетика. Засега се очекува Саудиска Арабија да продолжи со доброволно намалување на производството од 1 милион барели дневно до крајот на оваа година.
ОПЕК во октомври минатата година одлучи да го намали производството за два милиони барели дневно, а во мај годинава група земји предводени од Саудиска Арабија најавија дополнително намалување на производството за повеќе од милион барели дневно. Ријад и Москва минатиот месец потврдија дека планираат да ги продолжат кратењата до крајот на 2023 година, а министерот за енергетика на ОАЕ Сухаил ал-Мазруи смета дека параметрите на договорот нема да се променат следната година.
