Светска банка ја намали прогнозата за растот за земјите во развој во Источна Азија и Пацификот, наведувајќи го забавувањето на Кина и глобалната побарувачка во услови на сѐ уште високи каматни стапки и ослабена трговија, објави „CNBC“.
Институцијата очекува растечките економии во Источна Азија и Пацификот да пораснат за 5 отсто во 2023-та година, според нејзиниот октомвриски извештај објавен во понеделникот. Ова е нешто помалку од прогнозата од 5,1% во април.
За 2024-та година, глобалната банка со седиште во Вашингтон очекува раст од 4,5% за регионот, што е помалку од нејзината прогноза од 4,8% во април. Таа ја остави својата прогноза за економскиот раст на Кина во 2023-та година непроменета на 5,1%, но ја намали проценката за 2024-та година на 4,4% од 4,8% претходно. Организацијата ги наведе „долгорочните структурни фактори“, зголемувањето на нивото на долгот во втората по големина економија во светот и слабоста во секторот за недвижности како причини за намалувањето на рејтингот.
„Иако домашните фактори веројатно ќе имаат доминантно влијание врз растот во Кина, надворешните фактори ќе имаат посилно влијание врз растот во поголемиот дел од остатокот од регионот“, соопшти Светската банка.
Иако економиите на земјите од Источна Азија во голема мера закрепнаа од серијата шокови од 2020-та година, вклучително и пандемијата, и ќе продолжат да растат, финансиската институција верува дека темпото на раст најверојатно ќе се забави.
Зголемување на нивото на долгот
Светска банка забележува значително зголемување на долгот на секторот „Државно управување“, како и брз скок на нивоата на корпоративниот долг, особено во Кина, Тајланд и Виетнам. Таа предупредува дека високите нивоа на државниот долг може да ги ограничат и јавните и приватните инвестиции. Тоа може да доведе и до повисоки каматни стапки, што би ги зголемило трошоците за задолжување за приватните бизниси.
Според пресметките на Светска банка, зголемувањето на долгот на секторот „Државно управување“ кон БДП-то за 10 процентни поени се поврзува со пад на растот на инвестициите за 1,2 процентни поени. Слично на тоа, зголемувањето на приватниот долг кон БДП-то за 10 процентни поени е поврзано со пад на растот на инвестициите за 1,1 процентен поен.
Банката, исто така, забележува релативно високо ниво на долг на домаќинствата во Кина, Малезија и Тајланд во споредба со другите пазари во развој. Високата задолженост на домаќинствата може да има негативно влијание врз потрошувачката, бидејќи повеќе приходи ќе се користат за сервисирање на долговите, што може да доведе до намалување на трошоците.
Според Светска банка, зголемувањето на долгот на домаќинствата за 10 процентни поени би го намалило растот на потрошувачката за 0,4 процентни поени.
Во моментов, трошењето на домаќинствата е сè уште под трендовите пред пандемијата во развојниот регион на Источна Азија и Пацификот. Во Кина, сегашниот тренд на продажба на мало е послаб отколку пред пандемијата поради падот на цените на куќите, послабиот раст на приходот на домаќинствата, зголемените заштеди и долгови на домаќинствата и други структурни фактори како што е стареењето на населението, како што е заклучено од Светската банка.
