Производната активност во Кина се прошири за прв пат по шест месеци во септември, покажаа официјалните податоци.
„PMI“, врз основа на истражување на големите производители, се искачи на 50,2 во септември од 49,7 во август, според Бирото за национална статистика, надминувајќи ја границата од 50 поени што ја дели контракцијата од експанзијата. Податоците ја надминаа прогнозата од 50,0 поени.
Тоа е уште еден знак за стабилизација на кинеската економија, која забави по првичниот моментум на почетокот на годината кога беа укинати рестриктивните политики на Кина за Ковид-19.
Првите знаци на подобрување се појавија во август, со забрзување на растот во производството и продажбата на мало, додека падот на извозот и увозот се стесни и дефлаторните притисоци се намалија. Заработката на индустриските компании забележа изненаден скок од 17,2 отсто во август, повлекувајќи го падот од 6,7 отсто во јули.
„PMI на производството, плус добрите податоци за индустриските заработки, сугерираат дека економијата постепено го допира дното“, рече Џоу Хао, главен економист во „Guotai Junan International“, цитиран од „CNBC“.
Кинескиот непроизводен „PMI“, кој вклучува активност во услужните и градежниот сектор, исто така се зголеми на 51,7 од 51,0 во август.
Композитниот „PMI“, кој вклучува производна и непроизводна активност, се искачи на 52,0 во септември од 51,3 претходниот месец.
Имотни ризици
Постабилните економски показатели се добра вест за креаторите на политиките, кои продолжуваат да се борат со должничката криза во секторот за недвижнини што ги потресе светските пазари. Властите најавија серија мерки за зајакнување на пазарот на недвижнини, вклучително и намалување на каматните стапки на хипотеките. Сепак, секторот сѐ уште не ја надминал кризата.
Цените на новите станови паднаа најбрзо во последните 10 месеци во август, а инвестициите во имот паднаа 18-ти месец по ред.
„China Evergrande Group“, најзадолжената компанија за развој на имот во светот со долг од над 300 милијарди долари, во четвртокот соопшти дека нејзиниот основач е под истрага поради сомневање за „незаконски активности“.
Минатата недела, Азиската банка за развој ја намали прогнозата за економскиот раст на Кина во 2023-та година на 4,9 отсто од претходната прогноза од 5,0 отсто поради слабоста во секторот за недвижнини.
Аналитичарите веруваат дека ќе биде потребна поголема политичка поддршка за да се осигура дека економијата може да ја исполни целта на владата од околу 5% раст оваа година.
„Кинеската економија донекаде се стабилизираше по олабавувањето на политиките во секторот за недвижнини“, рече Живеи Жанг, главен економист во „Pinpoint Asset Management“.
„Клучното прашање е дали фискалната политика ќе стане постимулативна. Мислам дека тоа ќе се случи, но во следната година“, забележува економистот.
