Сѐ почесто наидуваме на огласи преку кои се бараат негуватели кои ќе им обезбедат квалитетен живот на нечии стари и изнемоштени родители.
Многу семејства се соочуваат со дилемата дали да ги сместат своите најблиски во домови за стари лица или да ги ангажираат професионални негуватели кои ќе им овозможат домашна нега.
Но, со оглед на тоа што најголемиот дел од домовите за стари лица во земјава не ги бие добар глас, затоа граѓаните одлучуваат да си ја испробаат среќата со негуватели кои обично ги бараат преку социјалните мрежи или по нечија препорака.
Еден таков оглас кружи на социјалните мрежи во последните денови, во кој една скопјанка бара негувател кој ќе се грижи за нејзиниот неподвижен татко само за време на викендите, со преспивање.
Таа нуди месечна плата од 16.000 денари, вклучително и подмирување на трошоците за превоз и храна.
„Се бара лице (маж) со искуство како негувател на полуподвижен маж (во количка) за викенди со преспивање: од петок во 19 часот до понеделник до 07 часот. Плата: 16.000 денари месечно плус оброци и услови за преноќување, хигиена и сл. Доколку сте од друг град, во зависност од висината на трошокот за транспорт ќе ви биде покриен дел/целиот. Саатницата е фиксна. Не смеете да бидете осудувани. Потребен е и контакт од лице од претходен ангажман за препорака. Предност: да сте активен возач. Заинтересираните, само сериозни, контајтирајте ме во приватна порака“, наведено е во огласот на Фејсбук.
Овој оглас предизвика голем интерес, но и различни коментари од корисниците на социјалните мрежи.
Некои од нив покажуваат сомнеж во квалитетот на услугата која може да се добие за таква плата, додека други го поставуваат прашањето дали постојат законски регулативи за оваа работа.
За да дознаеме повеќе за состојбата со негувателите на стари и изнемоштени лица во Македонија, контактиравме со една од нив, која работи како негувателка веќе неколку години.
Таа е Марина Стоиловска од Велес, која се грижи за неподвижна жена додека нејзините деца се на работа.
Таа вели дека добива плата од 25.000 денари месечно, а работното време изнесува 8 часа во денот.
„Јас сум негувателка од 2019 година. Од тогаш работам со разни клиенти, но моментално сум ангажирана од едно семејство од Скопје и се грижам за 75-годишна жена која е инвалид. Таа не може да се движи, да зборува или да јаде сама. Јас ја негувам од понеделник до петок, од 8 до 16 часот. Ги чекам нејзините деца да си дојдат од работа и тие ја преземаат негата. За викендите ја носат кај други роднини, а понекогаш плаќаат друг негувател. Јас добивам 25.000 денари плата, која мислам дека е прифатлива за оваа работа. Исто така, тие ми плаќаат и трошоци за превоз, бидејќи секој ден патувам со воз”, вели Марина.
Таа додава дека работата како негувател е многу тешка, но таа ја работи со големо задоволство.
„Јас сум многу поврзана со жената којашто ја негувам, таа ми е како моја сопствена мајка. Јас се обидувам да ѝ го олеснам животот колку што можам, да ѝ го подобрам расположението, да ѝ читам книги, да ѝ пеам песни, да ѝ правам масажи. Таа ме гледа со благодарност во очите и тоа ме радува. Ова е работа којашто не може да се прави само за пари, треба да имаш и срце и љубов”, вели Марина.
Според нејзиното искуство, потрагата по негуватели на стари и изнемоштени лица преку интернет е сѐ поголема, бидејќи луѓето немаат време или средства да ги сместат своите роднини во домови за стари лица или да ангажираат агенции за домашна нега.
„Често гледам огласи на интернет преку кои се бараат негуватели. Некои од нив се сериозни, а некои не. Јас мислам дека треба да има некаква контрола или регистрација за оваа работа, за да се спречат злоупотреби или несоодветни услуги. Исто така, треба да има и минимална плата за негуватели, којашто ќе ги задоволува нивните потреби и ќе ги цени нивните напори”, вели Марина.
Од друга страна, од Министерството за труд и социјална политика брифираат дека не постојат посебни законски регулативи за работата на негуватели на стари и изнемоштени лица.
Нашите извори оттаму велат дека ова е приватна работа помеѓу две страни, којашто треба да се уредува со договор.
Б.З.М.
