Глобалниот долг се зголеми за 10 трилиони долари во првата половина на 2023-та година, достигнувајќи ново рекордно високо ниво од 307 трилиони долари, се вели во извештајот на Институтот за меѓународни финансии.
Високите каматни стапки забележани во повеќето економии предизвикаа тој број нагло да се зголеми, со што сегашниот долг е 100 трилиони долари поголем отколку што беше пред десет години, објави „CNBC“.
Глобалниот сооднос на долгот и БДП-то сега е околу 336%, од 334% во четвртиот квартал од 2022-ра година, се додава во извештајот. Соодносот забележа седум последователни квартали на пад пред да ја продолжи својата нагорна траекторија во првата половина на 2023-та година.
Напливот на глобалната инфлација беше главниот фактор зад падот на коефициентот на долгот, потпомогнат од повисоките трошоци за задолжување и построгите стандарди за кредитирање.
Зрелите пазари како САД, Велика Британија, Јапонија и Франција беа одговорни за повеќе од 80% од зголемувањето на долгот во првата половина од годината, додека на пазарите во развој зголемувањето беше најизразено во Кина, Индија и Бразил.
Домашниот државен долг е на „алармантно ниво“ во многу земји од пазарите во развој, велат авторите на извештајот, ситуација за која глобалната финансиска архитектура е „лошо опремена“ да управува.
„Имањето пазарна рамка за справување со неодржливите нивоа на внатрешен долг може да ги поддржи иницијативите за мобилизирање ресурси за финансирање на развојот, вклучително и финансирање на борбата против климатските промени“, се вели во извештајот.
Во меѓувреме, потрошувачкиот долг останува „во голема мера податлив“ на зрелите пазари, при што соодносот на долгот на домаќинствата ќе падне на најниско ниво во последните две децении во првата половина на 2023-та година. Ова треба да даде дополнителен простор за натамошно затегнување на политиките од страна на централните банки доколку инфлацијата продолжи да биде висока.
„Здравјето на билансите на домаќинствата, особено во САД, ќе обезбеди тампон за понатамошни зголемувања на каматните стапки“, рече финансиската организација.
Извештајот доаѓа пред следната одлука за каматната стапка на Федералните резерви подоцна во среда. Се очекува американската централна банка да не ја зголеми основната каматна стапка, при што пазарите даваат само 1% шанса ФЕД да го направи 12-тото зголемување од март 2022-та година, според податоците на „CME Group“. Денеска е состанокот на Централната банка на Англија.
