Шампањот е белег на луксузното живеење со векови, но зголемените температури во Европа и се понепредвидливото време предизвикуваат загриженост дека францускиот регион Шампањ може да стане несоодветен за негово производство, предупредува „CNBC“.
Во 2022-ра година, Шампањ испорача повеќе од 325 милиони шишиња шампањ, со продажба над 6 милијарди евра за прв пат, според трговската асоцијација „Comité Champagne“. Најголеми пазари се САД, Велика Британија и Јапонија.
Здружението даде „внимателен изглед“ за 2023-та година, иако рече дека производителите на шампањ „и понатаму се уверени во здравјето на нивниот бизнис“.
Сепак, состојбата на климата фрла сомнеж за иднината на луксузниот пијалок – производителите на шампањ ќе мора да се прилагодат за да преживеат, а вкусот на пијалокот може да се промени.
Изгорено грозје, изменети вкусови
Според извештајот на „S&P Global Sustainable“, изложеноста на сушата на регионот Шампањ ќе се зголеми речиси тројно до 2050-та година, што ќе создаде сериозни проблеми за лозјата.
Извештајот ги оценува регионите на скала од 1 до 100, со резултат од 100 што претставува максимален ризик. Во него се наведува дека ризикот од суша во Шампањ ќе се зголеми од сегашното ниво од 16 на 43 до 2050-та година, а потоа двојно ќе се зголеми на 88 до 2090-та година – доколку не се направат промени во сегашните климатски политики.
Но, сушата не е единствениот фактор што може да го попречи производството. Времето станува се понепредвидливо, а пожарите, поплавите и мразовите се зачестени во областа во последните години. Дури и ако грозјето може да расте во променлива клима, тоа може да го промени развојот на плодовите и да предизвика штета.
„Доколку грозјето е изложено на премногу УВ, тие ќе добијат еквивалент на нашите изгореници и тоа ќе го оштети нивниот вкус“, изјави за „CNBC“, Мет Хоџсон, основач на англискиот продавач на вино „Grape Britannia“.
„Дополнителната топлина може да ја промени и киселоста на грозјето, што му дава на шампањ свежина и неопиплива возбуда“, вели Хоџсон.
И меѓународните производители се свесни за огромното влијание што климатските промени може да го имаат врз нивниот бизнис.
„Го разгледуваме влијанието на климатските промени врз сите територии на „Moët Hennessy“, иако во различен степен. Работиме понапорно од кога било за да се прилагодиме“, објаснува Сандрин Сомер, главен офицер за одржливост во одделот за вино и алкохолни пијалоци на „LVMH – Moët Hennessy“.
Начин на производство на шампањ
Најпознатото правило за шампањот е дека тој мора да се произведува во регионот Шампањ во Франција, но долгата листа на правила за означување што мора да се следат вклучува и специфични практики за самите лозја, набавка на грозје од одредени локации, специфични методи на пресување на материјалот и користење само одбрани сорти.
Употребата на пестициди и дополнителната киселост се забранети, а сите фази на производство мора да се одвиваат во Шампањ, сè до етикетирањето на шишето. Затоа производителите на шампањ ги подобруваат своите процеси за да останат во строгите граници, и покрај климатските промени.
„Пред 20 години, жетвата беше кон крајот на септември, почетокот на октомври. Сега се собира кон крајот на август и почетокот на септември“, изјави портпаролката на „Champagne Taittinger“, Клер Саразин за „CNBC“.
Промената на температурите значи и дека шампањот станува природно посладок.
„Имаме толку многу сонце и толку многу шеќер во сокот што не треба повеќе да додаваме. Тоа засега не е проблем, но тоа е нешто за што треба да се грижиме во иднина“, вели Саразин.
Според критичарите, вкусот на некои видови шампањ сега е многу различен од шампањот што луѓето го пиеле пред години.
„Во однос на вкусот, она што е многу забележливо се многу позрелите карактеристики“, изјави дегустаторот Том Хјусон за „CNBC“, додавајќи дека го доближува пијалокот до другите бели вина и го прави „попроѕирен“.
