Најголемата кинеска нафтена компанија „PetroChina Co.“ објави рекорден профит во првата половина, бидејќи повисоките нивоа на производство ги надоместија пониските цени на суровините и забавувањето на економијата на земјата, пишува „Bloomberg“.
Нето добивката на „PetroChina“ се зголеми за 4,5 отсто на 85,3 милијарди јуани (11,7 милијарди долари) во првите шест месеци од годината. Компанијата објави добивка од 82,39 милијарди јуани за истиот период во 2022-ра година.
„Резултатот се должи на значителното зголемување на продажбата на нафтени деривати, како и на приходите во сегментот на природен гас, што го компензира падот во рафинирањето и производството на хемикалии“, соопшти „PetroChina“.
Компанијата успеа да забележи зголемување на профитот, за разлика од локалните конкуренти „Sinopec“ и „Cnooc Ltd.“, каде што овој индикатор се намалуваше од година во година.
„PetroChina“ е „клучен корисник“ од намалените залихи на руска сирова нафта и олеснувањето на Пекинг за ограничувањата на цената на гасот, рече аналитичарот на „Citigroup Inc“, Тоби Шек.
Производството на сурова нафта на компанијата се зголеми за 5%, додека производството на гас порасна за 6,7%. Профитот од бизнисот со рафинирање и хемикалии во меѓувреме се намали за 24%.
„PetroChina“ има за цел да го зголеми производството на еквивалент од 1,73 милијарди барели во оваа година.
Компанијата ги намали трошоците на 85,1 милијарди јуани во првата половина од годината, во споредба со 92,3 милијарди јуани во првите шест месеци од 2022-ра година. Ова е во согласност со нејзиниот план да ги намали годишните трошоци за 11% на 243,5 милијарди јуани.
Матичната компанија на „PetroChina“, „China National Petroleum Corp.“, во јуни ја намали својата прогноза за растот на побарувачката на нафта во земјата во 2023-та година на 3,5 отсто, што е намалување од претходната проценка за зголемување од 5,1 отсто. Претпоставениот врв на потрошувачката на нафта во Кина и мрачните изгледи за извозот и инвестициите ја зголемија загриженоста за закрепнување на побарувачката на нафта.
Во меѓувреме, „PetroChina“ ги истакна надолните ризици за цената на нафтата до крајот на годината, но рече дека побарувачката за природен гас е подобрена и домашната потрошувачка на рафинирани производи постепено се опоравува.
