Економијата на Шведска се намали во вториот квартал, главно поради послабиот извоз и пониските трговски залихи, иако пријавениот пад беше помал од очекуваниот, покажаа во вторникот податоците на тамошната статистика.
Бруто домашниот производ (БДП) падна за 0,8% во периодот април-јуни во споредба со претходните три месеци. За споредба, минатомесечната првична проценка укажа на пад од 1,5 отсто, а просечната прогноза на аналитичарите анкетирани од „Reuters“ беше за пад од 1,3 отсто.
На годишна основа, БДП-то се намали за 1,0% во вториот квартал, коментираат од канцеларијата во соопштението. И првичната проценка беше за поголем пад од 2,4%.
Во претходните квартали, економијата имаше релативно силно работење и покрај забрзувањето на инфлацијата, повисоките каматни стапки, нестабилниот пазар на недвижнини и глобалната неизвесност. Во 2022-ра година економијата на земјата порасна за 2,8%.
„Вториот квартал од 2023-та година беше генерално слаб и забележани се падови кај некои од главните компоненти на БДП-то. Нето извозот падна, како и инвестициите во залихи“, коментираат од шведската статистика.
„Потрошувачката на домаќинствата четврти квартал по ред остана под нулата“, додаваат тие.
Централната банка (Riksbank) ја зголеми основната каматна стапка на 3,75% од 0% минатата година. Иако инфлацијата почна да се забавува и економијата се лади, се очекува регулаторот повторно да ги зголеми стапките во септември, можеби во ноември, поради загриженоста дека инфлацијата може да остане над целното ниво.
„Податоците за БДП-то не го менуваат нашиот став дека „Riksbank“ ќе ги зголеми стапките уште двапати на есен“, велат аналитичарите на „ЅЕВ“ во белешката до клиентите за податоците за БДП-то.
Во јуни, централната банка прогнозираше намалување на економијата од 0,5% во 2023-та година и сигнализираше барем уште едно зголемување на стапката оваа година.
„Слабиот економски раст е дефинитивно аргумент „Riksbank“ да дејствува претпазливо, но пресилната инфлација и особено послабата круна укажуваат дека „Riksbank“ сепак ќе ги зголеми каматните стапки во септември“, сметаат аналитичарите на „Nordea“.
Минатата недела владата ја намали годишната прогноза за БДП-то, посочувајќи на очекувано намалување од 0,8%.