На туристите кои се жалат колку е поскапо да се посети грчкиот остров Сифнос ова лето, менаџерката на хотелот Исидора Чандели може да им даде многу едноставно објаснување – јајца.
„Нашите посетители чувствуваат дека ја користиме силната побарувачка. Тие забораваат на високата инфлација со која сите се соочуваме. За да ме разберете, ќе кажам само дека едно јајце лани чинеше 25 центи, а годинава 45“, коментира Чандели, цитирана од „Financial Times“.
Во најатрактивните туристички дестинации во Европа, посетителите се соочуваат со големи зголемувања на цените бидејќи компаниите ја пренесуваат инфлацијата на своите клиенти.
Клаудио Скарпа, шеф на здружението на хотелиери во Венеција, рече дека пералниците на кои се потпираат хотелиерите во градот ги приспособиле своите цени за да одговараат на сметките за енергија кои се зголемија минатата година.
„Тоа имаше значително влијание врз нашите буџети. Ова ги принуди хотелите да ги прилагодат своите цени за 20%“, признава Скарпа.
Сега шефовите на Европската централна банка (ЕЦБ) се загрижени дека е на пат уште еден летен бран на инфлација предизвикана од туризмот, што може да ги попречи додека се обидуваат да ги задржат цените под контрола.
Цените за летови, ноќевањата во хотелите и одморите брзо се зголемија бидејќи секторот, кој беше речиси целосно погоден од исклучувањето во 2020-та година, сега се приближува до нивото на активност пред пандемијата.
Закрепнувањето на туризмот, кој директно генерира околу 4% (индиректно 10%) од бруто домашниот производ на ЕУ, придонесе за стабилноста на економијата во регионот, која се прошири за 0,3% помеѓу првиот и вториот квартал.
Сепак, ова доведе и до повисока инфлација во услужниот сектор. Со 5,6% од годишно до јули, ова е најсилната инфлација досега и далеку над целта на ЕЦБ од 2%.
Фабио Панета, член на извршниот одбор на ЕЦБ, го обвини последното зголемување на цената на услугите на „огромните“ трошоци за одмор и патувања.
„Важно е да се следи оваа компонента и нејзиното влијание врз ризиците за вкупната инфлација“, додаде тој.
Најголемиот европски синџир на хотели „Accor“, кој поседува повеќе од 3.000 имоти во регионот, соопшти дека ја зголемил просечната цена за ноќевање во хотелска соба за 18% во првите шест месеци од оваа година во споредба со истиот период минатата година.
Просечната цена на резервациите преку тур-оператор „Tui“ се зголеми за 7% во однос на претходната година, што е првпат да објави профит од почетокот на пандемијата. Главниот извршен директор на компанијата овој месец рече дека топлотниот бран што неодамна ја зафати Европа и шумските пожари во некои делови на континентот „само привремено го забавија претходно силниот моментум“.
Просечната цена на летовите во Европа годинава е зголемена за 31,6% во однос на минатата година, покажуваат податоците на компанијата „RDC“.
Податоците од „Airports Council Europe International“ покажуваат дека повеќе посетители од другите континенти пристигнуваат во Европа, особено туристи од САД. Овие патници на долги растојанија имаат тенденција да трошат многу повеќе од Европејците откако ќе пристигнат.
Истражувањето на Европската туристичка комисија, тело кое го промовира туризмот во регионот, покажува дека 41% од туристите во регионот се очекува да потрошат повеќе од 1.500 евра по лице за летните одмори оваа година, во споредба со 33% во минатата година.
Побарувачката нагло расте и покрај повисоките цени
Италијанската министерка за туризам Даниела Сантанче очекува повеќе од 19 милиони туристи да ја посетат нејзината земја во јули, а приходите од туризмот за месецот ќе бидат околу 10 милијарди евра, надминувајќи ги нивоата пред пандемијата и покрај топлотните бранови и поплавите. Во август, сепак, туристичките резервации во Италија се намалија за 1% на годишно ниво на 82 милиони.
Во првите пет месеци од оваа година, Грција прими 5,76 милиони странски посетители, или една третина повеќе од 2022-ра година, надминувајќи ги нивоата пред пандемијата. Приходите од грчкиот туризам достигнаа 1,75 милијарди евра во мај – четвртина повеќе од истиот месец во 2022-ра година.
Хрватска, најновата членка на еврозоната од јануари, прими 2,7 милиони странски туристи во јуни – 2,8% повеќе од минатата година.
Ситуацијата е подеднакво оптимистичка и во Шпанија, каде министерот за туризам Хектор Гомез го поздрави „извонредното“ закрепнување откако во јуни пристигнаа 9,1 милиони посетители во земјата, што е за 10% повеќе од минатата година.
„Луѓето трошат помалку на автомобили или купуваат помалку облека, но не се откажуваат од одморите“, рече Рамон Есталела, генерален секретар на „CEHAT“, шпанската трговска групација за сместување.
Есталела објасни дека растот на цените на собите од 8 отсто во годината до јуни е заостанат ефект на вкупната инфлација од 2019-та година.
„Хотелирите не можеа да ги покријат своите трошоци предизвикани од инфлацијата“, рече тој, додавајќи дека многумина сè уште ги исплаќаат долговите натрупани за време на пандемијата.
Чандели го поддржа, велејќи дека овогодинешното зголемување на цените на собите од 15 отсто во хотелот „Astra Verina“ во Сифнос е прво во последните четири години.
