Украина очекува нејзината економија да порасне за околу 5 отсто во следната година, поттикната од инвестициите во закрепнување и посилната побарувачка на потрошувачите, изјави висок претставник на Министерството за економија.
Министерството очекува бруто домашниот производ да порасне за околу 2,8 отсто во оваа година, рече Наталија Хоршкова, раководител на секторот за стратешко планирање и макроекономски прогнози во Министерството.
„Очекуваме раст од 5% во 2024-та година. Моторот ќе биде динамиката во инвестициите“, рече таа на тркалезната маса посветена на економијата.
Економијата на Украина се намали за околу една третина минатата година откако беше нападната од Русија во февруари. Годишниот пад беше најголем од независноста пред повеќе од 30 години.
Но, компаниите и индустриските производители се прилагодуваат на реалноста на војната подобро од очекуваното, а владата, аналитичарите и странските кредитори сега очекуваат економијата да расте.
Хоршкова рече дека Министерството очекува војната да заврши во 2024-та година и дека прекинот на борбите ќе помогне да се привлечат повеќе инвестиции за поддршка на обновата на земјата. Министерството за економија, исто така, очекува украинските бегалци да почнат да се враќаат и да ја поддржуваат локалната потрошувачка.
Министерството очекува околу 3 милиони луѓе да се вратат следната година доколку престанат борбите, додаде таа. Податоците на агенцијата за бегалци на ОН покажуваат дека на крајот на јули во Европа биле регистрирани околу 6 милиони украински бегалци.
