Ако лани овој период купувавме лубеница која чинеше 10 денари за килограм, годинава еден килограм бостан на пазар чини од 20 до 30 денари, додека, пак, во маркетите цената достигнува и до 50 денари.
Според познавачите, ваквото поскапување на лубеницата се должи на повеќе фактори како што се временските обрасци, прекините во синџирот на снабдување, транспортните трошоци, како и променливите барања на потрошувачите.
Ако погледнеме на глобално ниво, на пример, само во последните 30 дена просечната цена на лубеницата се искачила на 5,44 долари, а тоа претставува скок од 3,60 долари во споредба со истиот период минатата сезона.
И самите граѓани го забележуваат и се чудат на големото поскапување на бостанот.
-Не би купила лубеница по оваа цена, ама внучето искажа желба и затоа дојдов на пазар за да му купам и да го израдувам. Купив една лубеница од 10 килограми и платив 300 денари. Навистина е претерано, па со тие 300 денари ќе купам месо и ќе се наручам како човек. Впрочем, купувам најобична лубеница, а не авокадо или манго. Ова поскапување веќе не се поднесува, пазарџиите ги преминаа сите граници. Луѓето стануваат сѐ посиромашни и посиромашни, трпат за глад. Порано купувавме бостан за 5 до 10 денари за килограм, а сега лубеницата станува луксуз – ни изјави 62-годишната Лидија од Влае која ја сретнавме додека пазаруваше на пазарот во Ѓорче Петров.
Денар разговараше и со пазарџиите кои продаваат бостан на тезгите.
-Свесни сме за високата цена на бостанот и потполно се согласуваме со муштериите кога се лутат поради поскапувањето, но немаме друго решение. Ние сме препродавачи. Ги купуваме лубениците по одредена цена и ги продаваме на пазар. Но, тој што ни ги продава ни вели дека цената не може да биде иста со ланската, па ние сме принудени да ги купуваме поскапо, но и поскапо да ги продаваме. Во моментов килограм бостан чини 30 денари и не би знаеле кога ќе се намали цената. Ако погледнете во големите маркети, таму килограм лубеница се продава и за 50 денари – ни изјави продавачот.
Б.З.М.