Глобалната просечна старост на светските автомобилски флоти динамично се менува бидејќи се повеќе нови модели влегуваат на пазарот, а старите се пензионираат. Така, палетата на производи на повеќето производители постојано претрпува промени.
Сепак, еден од водечките експерти во индустријата, Фелипе Муњоз од „JATO Dynamics“, направи анализа за „Motor1“, покривајќи 71 марка и 766 модели. И покажува прилично интересни резултати.
„Lada“ ја нуди најстарата палета
Сосема очекувано, најважната автомобилска марка во Русија заостанува во однос на модерните автомобили. Стратешкото повторно лансирање на „Lada“, компанија во сопственост на „Renault“ до почетокот на војната во Украина, одеше добро благодарение на блиската соработка со францускиот автомобилски гигант. Сепак, планираните нови модели беа напуштени и сега руската марка во својата гама има само 5 патнички автомобили, чија просечна старост е 21,6 години.
За овој резултат не е заслужна само легендарната „Niva“, претставена во 1977-ма година. „Largus“, базиран на првиот „Dacia Logan“, „Granta“ (откриен во мај 2011-та година) и „Vesta“ (септември 2015-та година) исто така стареат. Овој тренд ќе се влоши бидејќи засега не се предвидуваат нови модели.
Следуваат три марки на „Stellantis“
„Chrysler“, „Lancia“ и „Dodge“ ја следат „Lada“ како брендови со најстари модели достапни на пазарот денес. Додека се подготвува да го прекине производството на „Chrysler 300“, американскиот производител на автомобили и понатаму има огромна потреба од свежи производи. До денес, просечната возраст на понудените „300“ и „Pacifica“ е 13,5 години.
Следува „Lancia“, бидејќи единствениот модел на италијанската марка – „Ypsilon“, веќе има 12,4 години. И последен е „Dodge“, со просек од 11 години, и покрај придонесот на „Hornet“, кој дебитираше во 2022-ра година.
Топ 10 марки со најстари автомобили ги заокружуваат „Tesla“ и „Jaguar“ (и двата по 7,9 години), како и „Nissan“, каде просечната старост на моделот е 7,9 години.
Свежината доаѓа од Кина
Исто така, очекувано најсвежите модели доаѓаат од Кина. Брендот со најмлад асортиман е „Zeekr“, кој е во сопственост на „Geely“ и основан во 2021-ва година. Нејзините три производи – „001“, „009“ и „X“ – имаат просечна старост од само 1,2 години. Следува уште еден кинески производител – „NIO“, со своите 7 автомобили стари во просек по 1,4 години. Благодарение на претставувањето на „Polestar 3“ и „4“ во октомври 2022-ра година и април 2023-та година, соодветно, шведскиот бренд ја зазема третата позиција меѓу помладите модели – 1,8 години.
Динамиката на „Hyundai“
Корејскиот бренд е присутен со 32 модели на различните пазари, а нивната просечна старост е само 3,1 година. Најстариот производ на брендот е европскиот „Hyundai i30“, претставен во септември 2016-та година! Не заостануваат и нејзините подружници „Genesis“ и „Kia“, со 3,1 и 4,7 години соодветно. Во исто време, „Toyota“ – најпопуларниот производител на автомобили во светот – има показател од 4,6 години, што е 0,4 под просекот во индустријата. Јапонците беа претекнати од „Honda“ (4,3 години) и „Ford“ (4,1 година). Спротивно на тоа, производите на големите светски брендови како „Chevrolet“ и „Volkswagen“ имаат просек од 6 години.
