Канадско претпријатие за енергетика започнува со работа на проширување на нуклеарна централа со потенцијал да го изгради најголемиот таков капацитет во светот во услови на зголемена побарувачка за чиста енергија, пишува „Bloomberg“.
Владата на Онтарио објави дека „Bruce Power“ ќе спроведе еколошка проценка за да додаде дури 4,8 гигавати капацитет на својата електрана во најнаселената провинција во Канада. Осумте реактори на објектот моментално имаат околу 6,2 гигавати вкупен капацитет и обезбедуваат околу 30 отсто од електричната енергија потрошена во покраината.
Проширувањето ќе ја направи локацијата поголема од јапонската нуклеарна централа Кашивазаки-Карива, која моментално е број еден со седум реактори и капацитет од повеќе од 8 гигавати.
Одлуката на компанијата ја одразува желбата на Канада да премине кон почисти извори на енергија и да игра поголема улога во глобалната борба против климатските промени. Канада развива планови за задолжителна електрична мрежа без јаглерод до 2035-та година, а проектот на „Bruce Power“ ќе биде првата конвенционална нуклеарна централа во покраината во последните три децении.
Друга компанија во регионот, „Ontario Power Generation Inc.“, е вклучена во развојот на нов тип на напреден реактор.
„Новата нуклеарна генерација ќе биде клучна за изградба на чистата мрежа на иднината“, рече Тод Смит, министер за енергија на Онтарио.