Истражувањата на бизнисот и потрошувачите за Австралија покажаа дека темни облаци се собираат над економијата на земјата. Деловната активност забавува, а довербата на потрошувачите останува околу нивоата на рецесија во услови на натамошно зголемување на каматните стапки.
Истражувањето на Националната австралиска банка (NAB), кое внимателно го следи централната банка, покажа дека индексот на деловните услови паднал за 7 поени на +8 поени, што е намалување од највисоките забележани во изминатата година.
Деловната доверба, исто така, се врати на негативна територија, а загрижувачки е што нарачките, водечки показател за побарувачката, паднаа во мај, нагласувајќи ги ризиците за растот во наредните месеци.
„Трендот во наредните месеци ќе биде важен бидејќи централната банка се обидува да процени дали направила доволно и дали основните инфлациски притисоци се намалуваат со време“, рече главниот економист на „NAB“, Алан Остер.
Сепак, истражувањето покажува постојани ценовни притисоци, а индикаторот за труд и набавна цена се забрзува, што предизвикува нова загриженост за централната банка.
Австралискиот регулатор ги зголеми клучните каматни стапки за 400 базични поени од мај минатата година на 11-годишен максимум од 4,1% и предупреди дека можеби ќе бидат потребни повеќе зголемувања.
Во вторникот, „NAB“ ја зголеми својата прогноза за врвот на клучните стапки во тековниот циклус, додавајќи уште две зголемувања од по четвртина поен на 4,6%. Банката ги намали очекувањата за економски раст во 2023-та година на 0,5% од 0,7% и прогнозираше дека стапката на невработеност ќе се зголеми на 5% до крајот на 2024-та година од 3,7% во април.
Пазарите во моментов ги ценат со ризик од уште две зголемувања на каматните стапки и очекуваат тие да останат високи до крајот на годината.
Во меѓувреме, податоците од „Westpac“ и „Commonwealth Bank of Australia“ (CBA), исто така, го покажаа притисокот што го чувствуваат потрошувачите бидејќи високите трошоци за живот и зголемувањето на хипотекарните стапки ја намалуваат куповната моќ.
Индексот на доверба на потрошувачите на „Westpac-Melbourne Institute“ се зголеми за 0,2% на 79,2 во јуни. Сепак, ова ја маскира значајната разлика пред и по последното зголемување на стапката на 6-ти јуни, бидејќи довербата беше на 72,6 поени по зголемувањето, во споредба со 89,0 поени претходно.
Изгледите за семејните финансии и економските услови за наредната година паднаа за 2,1% и 0,1%, соодветно, а индикаторот дали е добро време да се купи главен предмет за домаќинството падна за 5,7% во јуни.
