Федералните резерви на САД објавија дека по 15 месеци ќе паузираат низа зголемувања на каматните стапки. ФЕД ќе чека досегашните зголемувања на каматните стапки да го покажат својот целосен ефект врз економијата.
Од март 2022 година, претставниците на ФЕД ја зголемија референтната каматна стапка на централната банка 10 пати по ред во обид да ја заладат американската економија и да ја зауздаат инфлацијата, која сè уште е двапати повисока од целта од два проценти.
Како што се наведува во соопштението на Федералниот комитет за отворен пазар на ФЕД (FOMC), референтната каматна стапка на централната банка ќе продолжи да се задржува во опсег од пет до 5,25 отсто.
ФЕД ги задржа каматните стапки на нивното сегашно ниво, но во новите економски проекции посочи дека трошоците за позајмување најверојатно ќе се зголемат за уште половина процент до крајот на оваа година.
„Во обид да ги балансира ризиците за економијата со сè уште нерешената борба за контрола на инфлацијата, ФЕД одлучи да го задржи сегашниот опсег на каматни стапки и да ги процени дополнителните информации и нивните импликации врз монетарната политика“, соопшти американската централна банка.
Сите 11 присутни членови на FOMC гласаа за одлуката. Според проекциите на претставниците на ФЕД, инфлацијата ќе забави на 3,2 и 2,5 проценти оваа година и 2,5 проценти, соодветно, додека базичната инфлација ќе биде малку повисока (3,9 проценти во 2023 година и 2,6 проценти во следната година).
Економскиот раст мерен преку порастот на бруто домашниот производ годинава ќе изнесува скромни еден процент, додека во 2024 година ќе се забрза до 1,1 отсто, предвидуваат централните банкари.
Понатамошните зголемувања на стапките би го земале предвид кумулативното заострување на монетарната политика, заостанувања со кои монетарната политика влијае на економската активност и инфлацијата, како и на економските и финансиските движења, се наведува во образложението на одлуката на ФЕД.
Според новите проекции, референтната каматна стапка треба да порасне од сегашните 5,00-5,25 отсто на 5,50-5,75 отсто до крајот на тековната година.
Според таканаречениот „dot plot“, односно табелата што ги прикажува очекувањата на банкарите во однос на идните стапки, намалување на каматните стапки може да се очекува само во 2024 година.
