Дефицитот на работници во германскиот ИТ сектор минатата година беше најголем досега, на економијата и недостасуваа во просек 69.924 специјалисти. Во исто време, 27.136 италијанци не нашле работа, објави Институтот за економски истражувања во Келн.
Изградбата на дигитална инфраструктура во сите области на економијата со години ја диктира потребата од работници со соодветно образование, пренесува Seebiz. Германската економија не може да ги пополни отворените работни места во тој сектор од 2015 година.
Во првата година од пандемијата, бројот на непополнети работни места привремено се намали, но од 2021 година повторно е во пораст. Авторите на студијата наведуваат дека има изразен недостиг од стручни лица со високо образование. Лани имало недостиг од 34.000, а на осум од 10 огласи никој со соодветна стручност не одговорил.
Недостатокот не може да се пополни со свежи матуранти бидејќи е намален бројот на запишани студенти на математика, информатика, природни науки и инжинерство. Според мислењето на авторите на студијата на Институтот, решението е увоз на ИТ експерти, како и стратегии за преквалификација и доквалификација.
Во текот на изминатата деценија, Германија издаде голем број визи за квалификувани работници од Индија, Филипини и Индонезија, а високи функционери на германската влада деновиве ќе патуваат во Латинска Америка како дел од нивните напори да регрутираат добро квалификувани луѓе за работа во недостиг.
