Американската министерка за финансии Џенет Јелен денеска изјави дека 1 јуни останува краен рок за зголемување на лимитот на федералниот долг и предупреди дека се мали шансите владата да обезбеди доволно приходи за да го премости рокот до 15 јуни за повеќе плаќања на даночниот долг.
Јелен изјави за NBC дека ако Конгресот не го подигне плафонот на долгот, кој моментално изнесува 31,4 трилиони долари, пред Министерството за финансии да остане без пари, ќе има тешки одлуки да се донесат за плаќање на Американците и ќе бидат принудени да не ги исполнат финансиските обврски.
-Во моето последно писмо до Конгресот укажав дека очекуваме дека нема да можеме да ги платиме сите наши сметки на почетокот на јуни, а можеби и на 1ви јуни. И ќе продолжам да го информирам Конгресот, но секако не ја сменив мојата проценка. Така што мислам дека тоа е крајниот рок, рече Јелен.
На прашањето дали Министерството за финансии може да стигне до 15 јуни пред да остане без пари, Јелен рече дека постои одредена неизвесност за точниот ден кога тоа би можело да се случи, но таа се сомнева дека парите би можеле да траат и по 15 јуни, пренесува Ројтерс.
-Секогаш постои несигурност за даночните приходи и трошење, така што е тешко да се биде целосно сигурен во тоа, но мојата проценка е дека шансите да стигнеме до 15 јуни и да можеме да ги платиме сите сметки се прилично мали, рече Јелен.
Преговарачкиот тим на Белата куќа и конгресмените од редовите на републиканското мнозинство во петокот вечерта продолжија со дискусиите за прифатливиот максимум на јавниот долг на САД, прашања кои ги придружуваат немирите и неизвесноста на финансиските пазари.
Без договор меѓу двете страни, САД би можеле да се најдат во ситуација да не можат да го покријат јавниот долг во износ од 31,4 трилиони долари, што би значело дека американската администрација повеќе нема да може да позајмува или да ги сервисира сите неговите финансиски обврски.
