Просечната месечна исплатена нето-плата по вработен во Хрватска во март изнесува 1.130 евра, што е номинално повисока за 11,9 отсто, а реално за 1,1 отсто, покажуваат податоците на Државниот завод за статистика (ДЗС). Според денеска објавениот извештај, просечната плата од 1.130 евра е номинално повисока за 2,2 отсто, а реално за 1,3 отсто во однос на февруари.
Највисока просечна месечна исплатена нето-плата е исплатена во информатичките услужни дејности во износ од 2.327 евра, а најниска во заштитните и истражните дејствија од 738 евра. Според податоците на ДЗС, медијалната нето плата за март изнесувала 946 евра, што значи дека половина од вработените имале помалку, а половина повеќе од таа сума.
Просечната месечна бруто-плата по вработен во правните лица за март изнесува 1.556 евра, што е номинално повисока за 2,2 отсто, а реално за 1,3 отсто во однос на февруари. На годишно ниво просечната бруто плата е номинално повисока за 13,5 отсто, а реално за 2,5 отсто. Во март имало во просек 182 платени часови, што е за 15,2 отсто зголемување во однос на февруари.
Најмногу платени часови има во дејноста воден транспорт (191), а најмал број на платени часови има во дејноста социјална заштита без сместување (160). Просечната месечна исплатена нето-плата по час за март изнесува 6,08 евра, што е за 10,7 отсто пониска од февруари, а за 11,8 отсто повеќе од март лани.
