Ако Соединетите Американски Држави се најдат во ситуација да не ги платат своите долгови, Пекинг и Москва ќе ја искористат можноста да шират наративи за неспособноста на Америка да функционира како демократија, рече највисокиот американски разузнавач.
„Мислам дека нашите аналитичари би се согласиле дека е речиси сигурно дека Кина и Русија ќе се обидат да ја искористат таа можност“, рече директорката на националното разузнавање Аврил Хејнс пред Комитетот за вооружени служби на Сенатот.
На американскиот Конгрес му истекува времето за постигнување договор за зголемување на плафонот на долгот на федералната влада, кој сега изнесува 31,4 трилиони долари.
Постигнувањето на плафонот на долгот би значело дека американската влада повеќе нема да може да позајмува пари и во исто време ќе биде во ситуација да не може да го врати долгот.
Владата може да остане без пари до 1 јуни
Ова ќе ги разниша глобалните финансиски пазари и ќе ја поткопа довербата во САД како глобален деловен партнер.
Американската министерка за финансии Џенет Јелен предупреди дека американската влада би можела да остане без пари до 1 јуни доколку Конгресот не го подигне или суспендира плафонот на долгот.
Републиканците во Претставничкиот дом бараат прво драстично намалување на трошоците и укинување на некои од одлуките на демократскиот претседател Џо Бајден, вклучително и неговата програма за простување студентски заеми и даночни кредити за зелена енергија.
Бајден инсистира на подигање на плафонот на долгот без никакви услови, а минатата недела рече дека ова прашање не може да се преговара.
Горната граница на американскиот национален долг од 1960 година досега е подигната, продолжена или ревидирана 78 пати, потсетува Би-Би-Си.
