Американски дипломатски конвој беше нападнат во Судан, изјави во вторник државниот секретар Ентони Блинкен.
Тој рече дека се верува дека нападот го извршиле војници поврзани со паравоената група Сили за брза поддршка (РСФ) и го опиша инцидентот како „невнимателен“ и „неодговорен“.
Луѓето во дипломатскиот конвој се безбедни, рече тој.
„Се разбира, имаме длабока загриженост за целокупното безбедносно опкружување бидејќи тоа влијае на цивилите, како што влијае на дипломатите, како што влијае на хуманитарните работници“, рече тој.
Блинкен изјави дека во телефонски разговор со командантот на вооружените сили на Судан, генерал Абдел Фатах ел Бурхан, и со шефот на РСФ, генерал Мохамед Хамдан Дагал, пренел дека каков било напад врз американски дипломати е неприфатлив.
„Ние сме длабоко загрижени за целокупната ситуација и безбедноста“, изјави Блинкен за новинарите во Јапонија на 18 април, каде што учествуваше на состанокот на министрите за надворешни работи на Г7.
Во претходните конфликти во Судан загинаа најмалку 185 лица, а повеќе од 1.800 беа ранети. Двете страни во овој конфликт, во кој се користат артилерија и авијација, тврдат дека напредуваат.
Судирите продолжија и покрај бројните повици од Соединетите Држави и други земји за прекин на борбите, како и напорите на Египет и Обединетите Арапски Емирати да ги принудат ривалите да се согласат на прекин на огнот.
САД се во тесна координација со другите земји кои имаат влијание во Судан, вклучувајќи ги Обединетите Арапски Емирати, Саудиска Арабија и Велика Британија, рече тој, како и со Африканската унија и другите меѓународни организации, пишува РСЕ.
