Минатата недела, опсерваторијата за соларна динамика на НАСА сними видео од огнено торнадо кое пламнува низ површината на Сонцето.
Овој феномен почнал да се формира на 14 март, а четири дена подоцна експлодирал во облак од магнетизиран гас, исфрлајќи плазма во вселената, пренесува Business Insider.
„Овој облак од плазма, висок како 14 Земји, исфрлал парчиња запалив материјал со големина на Месечината“, напиша астрофотографот Ендрју Мекарти на Твитер во саботата. Мекарти додаде дека поминал три часа со соларниот телескоп вперен кон Сонцето. Тој успеа да го сними овој неверојатен феномен.
Иако изгледаше спектакуларно, овој настан нема да му наштети на животот на Земјата.
„Она што го видовме овде е навистина на големи размери“, вели Свен Ведемаер, професор по соларна физика на Универзитетот во Осло.
Ова е последниот во серијата неверојатни, но главно безопасни феномени забележани на површината на Сонцето: нашата ѕвезда полека се приближува до врвот на својот 11-годишен сончев циклус.
Магнетната структура што го предизвика ова торнадо беше всушност многу поголема од она што можевме да го видиме.
„Она што го гледаме овде е филамент на поларната корона (PCF). Филаментот е огромна, завиткана магнетна структура која се формира над површината на Сонцето, понекогаш со месеци“, вели Метју Овенс, професор по вселенска физика на Универзитетот во Рединг.
Сонцето е огромна „топка“ од зовриен гас и плазма, а содржи топли наелектризирани честички. Додека се движат околу Сонцето, тие создаваат магнетни полиња кои еруптираат низ сончевата површина. Некои од овие магнетни полиња се огромни и се протегаат во вселената во облик на лак, прикачен на површината на неколку места. Овие места се нарекуваат филаменти.
Сончевите торнада се уште еден пример за тие места, вели Ведемаер.
„Со текот на времето, филаментите се распаѓаат или еруптираат во вселената“, објаснува Овенс.
Во случајот на ова торнадо, филаментот се распадна, наелектризираните честички во експлозијата беа исфрлени од околината на Сонцето и полетаа во вселената со огромна брзина. Кога би се упатиле кон Земјата, можеби ќе има повеќе поларна светлина или мешање во работата на електричните мрежи, но во овој случај нема ризик бидејќи нашата планета не беше на патот на ерупцијата.
Иако името „торнадо“ сугерира дека овој феномен се врти, тоа не е сосема точно“, вели Ведемаер.
„Постојат две можности. „Или имате структура која се држи заедно со магнетните полиња и всушност се ротира, или она што го гледате е всушност плазма која следи некое претходно закривено магнетно поле и дава впечаток на ротација, но всушност само се движи нагоре и надолу во слаба спирала“, објаснува тој.
„Една теорија е дека правилната ротација може да ја дестабилизира целата структура, што може да придонесе за ерупција“, додава тој.
Сонцето станува се поактивно
Веројатно ќе видиме повеќе фантастични соларни феномени во наредните години, бидејќи Сонцето се приближува до соларниот максимум, врвот на активност што се случува приближно на секои 11 години.
Заедно со овие прекрасни структури, гледаме и појава на повеќе Сончеви дамки. Една таква неодамна се појави на површината на Сонцето, која би донела фантастични сцени на поларната светлина на Земјата во следните неколку дена.
