Објавени податоците за просечната плата во Загреб

Просечната месечна исплатена нето-плата по вработен во Загреб за јануари годинава изнесува 1.256 евра, што е номинален пораст од 11 отсто во однос на јануари минатата година, соопшти Одделението за статистика на Градскиот завод за стратешко планирање и развој на градот Загреб.

Споредено со просечната месечна плата за јануари во Хрватска, која изнесувала 1.094 евра, просечната загребска нето-плата исплатена за тој месец била за 162 евра поголема.

Највисока просечна месечна нето-плата кај правните лица за јануари 2023 година е исплатена во дејноста вадење сурова нафта и природен гас, во износ од 1.970 евра.

Најниската плата е исплатена во производството на кожа и сродни производи, во износ од 706 евра.

Просечната месечна бруто-плата по вработен во градот Загреб за јануари 2023 година изнесува 1.766 евра, што е номинален пораст од 11,9 отсто во однос на јануари 2022 година.