Пет од најпрометните аеродроми во светот во 2022-ра година се во Соединетите држави, според прелиминарните податоци за глобалниот воздушен сообраќај, цитирани од „CNN“.
Меѓународниот совет на аеродроми (ACI), трговско здружение кое претставува речиси 2.000 аеродроми, го објави своето најново рангирање.
Меѓународниот аеродром Хартсфилд-Џексон во Атланта е сè уште најпрометниот аеродром во светот по обем на патници во 2022-ра година, задржувајќи го првото место што го врати во 2021-ва година, откако беше соборен за време на пандемијата.
Далас/Форт Ворт, Денвер и О’Харе во Чикаго се рангирани на второто, третото и четвртото место, соодветно, а Лос Анџелес е бр. 6 меѓу најпрометните аеродроми во 2022-ра година.
Силните перформанси на американските аеродроми, објаснуваат авторите на извештајот, се должат на здравото закрепнување на домашниот пазар на земјата. Сите американски аеродроми во топ 10 имаат значителен удел во домашните патнички летови – меѓу 75% и 95% внатрешен сообраќај.
Поопшто, домашните пазари закрепнуваат побрзо од меѓународните пазари.
„На меѓународните пазари, се разбира, малку повеќе страдаме во однос на закрепнувањето“, рече Луис Фелипе де Оливеира, извршен директор на „ACI World“, во интервју за „CNN Travel“.
„Dubai International“ (бр. 5), лондонскиот Хитроу (бр. 8) и парискиот Шарл де Гол (бр. 10) се враќаат во првите 10 во 2022-ра година, откако паднаа од врвот на рангирањето во двете пандемиски години.
Лондонскиот аеродром Хитроу го забележа најголемиот пораст на сообраќајот од 10-те најдобри од година во година, со речиси 218% зголемување на бројот на патници во споредба со 2021-ва година, благодарение на укинувањето на ограничувањата во март 2022-ра година.
Инаку, и во 2022-ра година, Дубаи е аеродром број 1 по меѓународни патници, а по него се токму Хитроу и амстердамскиот Шипхол.
Нови додатоци на севкупните топ 10 најпрометни аеродроми за 2022-ра година се Истанбул на #7 и меѓународниот аеродром Индира Ганди во Делхи на #9.
За прв пат по многу години, ниту еден кинески аеродром не се најде на листата на 10-те најпрометни, исто така истакна „CNN“, иако Кина е втор по големина домашен туристички пазар во светот по САД.
Според Меѓународниот совет на аеродроми, глобалниот сообраќај достигна скоро 7 милијарди патници во 2022-ра година, што е за 73,8% повеќе од нивото во 2019-та година, со домашните патувања на 80% од нивоата во 2019-та година, додека меѓународниот сообраќај со 60% во споредба со минатата година пред пандемијата.
Авиосообраќајот се зголемува во 2023-та година
„Минатата година, исто така, донесе некои дополнителни пореметувања во воздушниот сообраќај во некои региони, поврзани со наглото зголемување на побарувачката што го надмина зголемувањето на персоналот и капацитетот што беа намалени на почетокот на пандемијата“, рече генералниот директор на „ACI World“, кој рече дека оваа година треба да биде „многу подобра“ бидејќи воздушниот сообраќај е „екосистем“.
„Немаме авиокомпанија без аеродром. Немаме аеродром без авиокомпанија, но нема индустрија без клиентите, патниците. Затоа за нас е многу важно да го поддржуваме и да работиме заедно со целиот екосистем да обезбедиме добра услуга за нашите патници. И на овој начин ќе бидеме многу поподготвени од минатата година да се справиме со побарувачката“, вели де Оливеира.
Една од најголемите лекции за индустријата од пандемијата? Потребата од глобална соработка.
„Не можеме да носиме одлуки кои не се засноваат на факти кои не се засноваат, пак, на наука“, вели де Оливеира, истакнувајќи ја потребата од координирани правила, „а не секоја земја да донесува одлука врз основа на сопствените заклучоци за мерките што треба да се преземат“.
„ACI“ очекува глобалниот патнички сообраќај да достигне 92% од нивоата во 2019-та година во 2023-та година. Целосно закрепнување на нивоата пред пандемијата не се очекува до 2024-та година.
Еве ја листата на десетте најпрометни аеродроми во светот во однос на патничкиот сообраќај во 2022-ра година:
1. Хартсфилд-Џексон, Атланта, ГА: 93,7 милиони патници; пораст од 23,8% во однос на 2021-ва година.
2. Далас/Форт Ворт, Тексас: 2 милиони: 73,4 милиони патници; пораст од 17,5% во однос на 2021-ва година.
3. Денвер, Колорадо: 69,3 милиони патници; пораст од 17,8% во однос на 2021-ва година.
4. Чикаго О’Харе, Илиноис: 68,3 милиони патници; зголемување од 26,5% во однос на 2021-ва година.
5. Дубаи, Обединети Арапски Емирати: 66,1 милиони патници; зголемување од 127% во однос на 2021-ва година.
6. Лос Анџелес, Калифорнија: 65,9 милиони патници; зголемување од 37,3% во однос на 2021-ва година.
7. Истанбул, Турција: 64,3 милиони патници; пораст од 73,8% во однос на 2021-ва година.
8. Лондон Хитроу, Обединето Кралство: 61,6 милиони патници; зголемување од 217,7% во однос на 2021-ва година.
9. Делхи, Индија: 59,5 милиони патници; зголемување од 60,2% во однос на 2021-ва година.
10. Париз Шарл де Гол, Франција: 57,5 милиони патници; пораст од 119,4% во однос на 2021-ва година.
