Економијата на Британија порасна во четвртиот квартал од минатата година, покажаа официјалните податоци во петокот, бидејќи растот на бизнисот со туристичките агенции и владината поддршка за зголемените сметки за енергија и помогнаа на земјата да избегне паѓање во рецесија.
Економското производство се зголеми за 0,1 отсто во периодот октомври-декември во однос на претходните три месеци, откако се намали за ревидирани 0,1 отсто во третиот квартал, што е помал пад отколку што се мислеше. Претходно, Канцеларијата за национална статистика (ONS) објави дека економијата не пораснала во четвртиот квартал од 2022-ра година.
„Економијата беше нешто посилна во втората половина од минатата година отколку што се мислеше, а подоцнежните податоци покажаа дека телекомуникациите, градежништвото и производството се подобрија отколку што првично се мислеше во последниот квартал“, рече статистичарот на „ONS“, Дарен Морган.
Силниот услужен сектор во Британија порасна за 0,1%, поддржан од речиси 11% скок на туристичките агенции.
Производството порасна за 0,5% благодарение на често нестабилниот фармацевтски сектор, а градежништвото за 1,3%.
Заштедите на домаќинствата се зголемија, поттикнати од владината шема за олеснување на сметките за енергија, при што соодносот на заштеди се зголеми на 9,3% од расположливиот приход, во споредба со нивото од 5,6% непосредно пред пандемијата. Расположливиот приход на домаќинствата порасна за 1,3% по четири последователни квартали со негативен раст.
Во јануари, Меѓународниот монетарен фонд рече дека Британија е на пат да биде единствената голема напредна економија на Г-7 што ќе се намали во 2023-та година, иако економските податоци оттогаш се посилни отколку што очекуваа аналитичарите.
„ONS“ објави дека деловните инвестиции паднале за 0,2% на квартална основа, во споредба со првата проценка за раст од 4,8%. Зад големата ревизија стојат промени во начинот на пресметување на сезонските приспособувања на податоците.
На почетокот на овој месец, државниот канцелар Џереми Хант објави нови стимулации кои имаат за цел да ги охрабрат компаниите да инвестираат, иако даночните олеснувања се помалку дарежливи од претходната шема и доаѓаат токму кога корпоративниот данок треба да се зголеми (во април).
„ONS“ објави дека британското економско производство во четвртиот квартал е 0,6% под нивото од крајот на 2019-та година. Тоа е единствената економија на Г-7 што не закрепна од пандемијата со Ковид-19.
