Комитетот за заштита на потрошувачите и внатрешен пазар на Европскиот парламент гласаше за предлог-законот за забрана на вградени дефекти и програмирана застареност на производите. Ова е нов дел од Директивата на ЕУ за зајакнување на позицијата на потрошувачите во зелената транзиција.
Хрватската пратеничка во Европскиот парламент и претседателка на комисијата за заштита на потрошувачите Билјана Борзан соопшти дека при гласањето имало 39 гласа за и еден против усвојувањето на предложениот закон.
„Ние сме чекор поблиску до голема победа за потрошувачите“, напиша таа на својот Твитер профил.
Инаку, Борзан претходно објави анкета која покажа дека во Хрватска дури 94 отсто од граѓаните веруваат дека уредите произведени пред 20 години траат подолго од оние од поновото производство. Исто така, докажано е дека уредите најмногу се расипуваат помеѓу втората и третата година на користење, односно веднаш по истекот на двегодишната законска гаранција.
„Станува збор за таканаречениот програмиран дефект на уредот. Граѓаните забележаа дека штом истече гаранцијата за еден уред, тој брзо се расипува. И покрај фактот дека технологијата напредна во споредба со шеесеттите или седумдесеттите години на минатиот век, кога апаратите за домаќинство траеја 10 или повеќе години. Сега тој рок е 5-6 години или многу пократок. „Тоа е неодржливо во однос на животната средина бидејќи го фрламе гломазниот отпад, но е и удар по џебот на потрошувачот, бидејќи некои апарати мора постојано да се обновуваат“, рече таа.
Затоа, со новиот предлог-закон ќе се забрани продажба на уреди кои не можат да се поправат, доколку купувачот за ова не биде информиран пред самото купување.
„Ќе елиминираме уште една иритирачка практика, а тоа е да продаваме производи за кои е потребна замена на потрошни делови пред да биде неопходно. На пример, кога печатачот ќе почне да сигнализира дека нема боја, иако тонерот е сè уште релативно полн“, објасни Борзан.
По одобрувањето од Комитетот, новите правила мора да бидат потврдени со гласање на целиот Европски парламент на седницата што ќе се одржи во април.
