Цените на живеалишта на голем број од најголемите светски пазари ќе продолжат да паѓаат во оваа година, според анкетата на „Reuters“ на аналитичари за недвижнини кои предвидуваа или поголеми падови или ја задржаа својата прогноза непроменета од анкетата три месеци претходно.
Падот што претстои може да биде уште поостар бидејќи анкетата беше спроведен пред Федералните резерви да кажат оваа недела дека каматните стапки во САД веројатно дополнително ќе се зголемат и ќе останат на високи нивоа подолго отколку што се мислеше.
Зголемувањето на хипотекарните стапки во време кога централните банки ги зголемуваат своите клучни стапки за да ја ограничат инфлацијата и историскиот пораст на цените на живеалишта за време на пандемијата на Ковид-19 ја направија сопственоста на домови речиси невозможна за многу потенцијални купувачи на прв дом.
Ова ги зголеми кириите на повеќето пазари, со што вкупните трошоци за домување станаа многу повисоки отколку пред само неколку години.
Проектираниот пад на цените на домови во САД, Канада, Велика Британија, Германија, Австралија и Нов Зеланд ќе дојде откако ќе се зголемат за дури 50% од почетокот на пандемијата во 2020-та година.
Педесет од 96 аналитичари анкетирани меѓу 15-ти февруари и 8-ми март рекоа дека достапноста ќе се влоши оваа година. Меѓу нив, девет експерти забележуваат дека значително ќе се влоши.
„Пазарите кои забележаа најсилен раст за време на пандемијата, земјите како Нов Зеланд, Канада, нордиските пазари, најверојатно ќе бидат најтешко погодени“, забележува Кејт Еверет-Ален, шеф на глобалното истражување за домување во консултантската куќа „Knight Frank“.
Цените на живеалишта во Канада и Нов Зеланд, кои почнаа да се намалуваат минатата година, се очекува да забележат пад од најмалку 20% од својот врв, се вели во истражувањето.
Двете земји имаат висок коефициент на долг на домаќинствата и приход.
Двоцифрен пад од највисоките цени во последните години се очекува и за Австралија (16%), Германија (11,5%) и САД (10%). Цените на домовите во Велика Британија се предвидува да паднат за 8%.
Меѓу најчесто наведените причини за високите цени на домовите е недостатокот на понуда, што се влоши за време на пандемијата, кога градежништвото речиси запре и побарувачката продолжи да расте.
„Забавувањето на новите станбени згради и падот на градежните дозволи се очекува да го влошат недостигот на станови во многу земји ширум светот бидејќи растот на населението продолжува да ја надминува понудата на нови станови“, велат аналитичарите на „JLL“.
„Во 2023-та година се очекува забавување на градежништвото, при што повеќето пазари предвидуваат пад на понудата“, додаваат тие.
Но, активноста на проблематичниот пазар на имот во Кина, каде што голем број компании ги суспендираа плаќањата на долгот минатата година, се предвидува дека ќе се врати оваа година бидејќи политиките за стимулација и укинувањето на ограничувањата на Ковид-19 го подобруваат расположението.
Сепак, индискиот пазар на станови ќе остане отпорен и покрај зголемувањето на каматните стапки. Се очекува и цените на становите во Дубаи да растат постојано.
