Експертите долго време предупредуваат на зголемените ризици поради глобалното затоплување, што во Германија е особено видливо при поројни дождови, поплави, топлотни бранови и суши.
Од почетокот на милениумот, вкупната штета предизвикана од екстремните временски настани во Германија изнесува 145 милијарди евра. Но, ситуацијата може да стане уште полоша, се вели во заклучокот на студијата нарачана од Федералното Министерство за економски прашања и заштита на климата.
Студијата на Институтот за истражување на економијата на животната средина (IÖW), „Gesellschaft für Wirtschaftliche Strukturforschung“ (GWS) и „Prognos AG“ ги квантифицира трошоците според различни сценарија. Во зависност од степенот на глобалното затоплување, експертите проценуваат дека економските штети се меѓу 280 и 900 милијарди евра меѓу 2022-ра и 2050-та година.
Не можат да се измерат сите штети. Дополнително, ќе има здравствени штети како и смртни случаи од горештини и поплави и губење на биолошката разновидност.
„Климатските промени веќе имаат тешки економски последици, кои можат значително да пораснат денес“, вели државниот секретар за економски прашања Стефан Венцел.
„Секое евро инвестирано во заштитата на климата ги намалува економските трошоци што може да настанат во иднина поради екстремните временски настани“, додава тој.
За да се намали финансиското влијание на климатската криза, германската влада работи на „Закон за адаптација на климата“.
„Последиците од климатската криза имаат значително влијание врз благосостојбата во Германија“, рече државниот секретар за животна средина Кристијане Роледер.
Според неа, инвестициите во амбициозната заштита на климата и претпазливото прилагодување кон неа се клучни за зголемување на отпорноста и адаптивниот капацитет на екосистемите.
Германија не може да се спаси
Економистот Хубертус Бард од „Institut der deutschen Wirtschaft“ (IW), исто така, гледа итна потреба за акција.
„Со заштитата на климата мораме да и помогнеме на глобалната клима, со мерки за адаптација можеме значително да ги намалиме трошоците за климатските влијанија“, рече тој за „Handelsblatt“.
„Германските напори за заштита на климата даваат малку придобивки кога станува збор за избегнување штета во Германија. Ќе бидат потребни и двете: глобални напори за заштита на климата и локални мерки за прилагодување на климата што се менува“, вели Бард.
Генерално, воочената штета е претежно директна штета поврзана со климатските промени, како што се куќи, мостови или патишта уништени од поплави. Сепак, економските трошоци на кои се фокусира студијата надминуваат чисто закрепнување.
Во нивните сценарија, авторите ги земаат предвид и, на пример, дополнителните оптоварувања поради ограничените производствени капацитети или прекинатите синџири на снабдување. Екстремните временски настани во странство се релевантни и за германската економија. Еве кои сектори се особено погодени:
Индустрија и трговија
За индустриските и трговските претпријатија екстремните временски услови значат: можни оштетувања на згради, производствени хали или производствени капацитети, како и загуби во производството. Ова може да доведе до „трајно слабеење на националната економија“, предупредуваат авторите. Од друга страна, поправката на оштетените згради дава „поттик на економијата“ преку инвестиции во градежништвото, велат тие.
Периодите на топлина и суша, исто така, го загрозуваат непреченото производство. Ако е многу топло, вработените имаат тенденција да работат помалку продуктивно. Покрај тоа, индустријата и трговијата зависат од непреченото движење на стоките и снабдувањето со суровини и меѓупроизводи.
Трговија
Во однос на суровини и меѓупроизводи, Германија е зависна од земјите кои можат да бидат силно погодени од ефектите на климатските промени. Според истражувањето, тоа се Бразил, Виетнам, Индија, Јужна Африка и Тајланд.
Важни стоковни групи се земјоделски производи, руди, храна и добиточна храна (Бразил), опрема за обработка на податоци, електронски и оптички производи (Виетнам, Тајланд) и потрошен материјал за автомобилската и инженерската индустрија (Јужна Африка).
Поради последователните и меѓусебно зависни ефекти, тешко е да се одреди степенот на штетата. Сепак, се претпоставува дека, слично како и во Германија, екстремните временски настани во овие земји може да ги оштетат производствените капацитети или инфраструктурата и на тој начин да имаат негативно влијание врз производните процеси во таа земја.
Навигација по внатрешни водни патишта
Климатските проекции укажуваат дека одводнувањето на реките ќе стане почесто и поинтензивно, особено од средината на векот, што директно може да влијае на внатрешниот превоз во Германија.
Ова ќе има директно влијание врз обемот на транспортот и транспортните трошоци. Индиректна последица би била доколку компаниите одлучат да го пренасочат транспортот на други начини поради зголемената неизвесност.
Земјоделство
Топлината и сушата не само што доведуваат до губење на земјоделските приноси, туку и до повисоки цени, што пак влијае на прехранбената индустрија и евентуално доведува до промени во однесувањето на потрошувачите.
Според германската студија, трошоците за климатските промени за локалното земјоделство се „повеќе одредени од развојот на светските пазари“.
Ова значи дека ако глобалните цени на земјоделството се зголемат поради загубите на земјоделските култури, производството на храна исто така ќе поскапи во Германија. Ќе се намали меѓународната конкурентност на релевантните економски сектори.
Шумарство
Експертите очекуваат дека глобалните климатски промени ќе ја намалат потенцијалната површина за користење шуми. За да ги разјасни импликациите, студијата се фокусира во своето расходно сценарио, како во случајот со земјоделството, на развојот на цените за увозот, производството и површината. Во пресметките се зема предвид и фактот дека шумарството е тесно поврзано со преработката на дрво.
На крајот, цената на изгубениот принос, во зависност од сериозноста на климатските промени, произлегува од зголемувањето на домашните и увозните цени предизвикани од климатските промени.
Авторите тврдат дека ефектите од климатската криза повеќе не можат да се спречат, туку можат да се содржат преку мерки за адаптација.
Според тоа, економските трошоци може значително да се намалат од 900 милијарди евра на 350 милијарди евра во случај на сериозни климатски промени.
