Во четвртиот квартал од 2022-ра година, германската економија се намали двојно повеќе отколку што се мислеше.
Како што објави Федералниот завод за статистика (Дестатис) во својата втора проценка, бруто домашниот производ (БДП) падна за 0,4% во однос на претходниот квартал по ценовните, сезонските и календарските приспособувања и го надмина нивото од истиот квартал од претходната година за 0,9 % по прилагодувањата на календарот, пренесува ДПА.
Во првото соопштение, кое економистите анкетирани од „Dow Jones Newswires“ очекуваа да биде потврдено, статистичарите објавија пад на БДП-то од само 0,2 отсто и годишна стапка на раст од 1,1 отсто.
„Динамиката на германската економија значително ослабе на крајот на годината“, се вели во соопштението на Заводот за статистика.
Главната причина беше падот на приватните потрошувачки трошоци за 1,0% во однос на претходниот квартал поради високата инфлација.
Ако БДП-то се намали и во тековниот квартал, а со тоа и два квартали по ред, Германија ќе биде во техничка рецесија.
За 2023-та година, сепак, повеќето експерти повеќе не се толку песимисти како што беа есента, и покрај војната во Украина и континуираните ограничувања во снабдувањето.
Германската влада, на пример, очекува дека економијата ќе забрза за 0,2% во оваа година. Сепак, поради ефектите од енергетската криза, растот ќе биде многу послаб од растот од 1,8% во 2022-ра година.
