Европските земји значително ја намалија потрошувачката на гас

Европските земји ја намалија потрошувачката на гас во периодот од август минатата година до јануари годинава, што е резултат на помалата потрошувачка во домаќинствата поради невообичаено топлото време, високите трошоци за индустријата што предизвика помало производство и спроведувањето на државните мерки, пренесува Ројтерс.

Вкупната потрошувачка на гас во рамките на Европската унија е намалена за 19,3 отсто од август во однос на петгодишниот просек во истиот период, објави Европската статистичка агенција (Евростат).

Русија, претходно главен снабдувач, драстично го намали снабдувањето со гас за европските земји во месеците по инвазијата на Украина во февруари 2022 година, што испрати верижна реакција на рекордно високите цени на гасот на европскиот пазар.

Помалата потрошувачка им помогна на земјите од ЕУ, па залихите се невообичаено полни пред крајот на зимата.

Ројтерс потсетува дека европските цени на гасот паѓаат од декември, но и понатаму се повисоки од претходните години.