Помеѓу Унгарија и Германија нова искра, овој пат „нуклеарна“. Будимпешта ја обвинува Германија дека го блокира извозот на опрема за нуклеарната централа Пакш што ја градат Русите. Берлин се уште не е огласен. На светскиот пазар се зголемува ривалството во развојот на нуклеарните технологии, со цел да се потисне руската.
Нуклеарната централа Пакш има четири реактори и обезбедува речиси половина од електричната енергија на Унгарија. Во 2014 година беше потпишан договор со руската компанија Росатом за изградба на уште два реактори, а работите почнаа минатата година.
Дел од опремата е договорена со француски и германски компании – „Сименс енерџи“ и „Фрамат“. И додека француската влада на својата компанија и дала извозни дозволи, Германија не, па Будимпешта жестоко реагира.
„Германската влада го блокира „Сименс енерџи“ да го испорача договорениот контролен систем за нуклеарната централа Пакш. Тие немаат законско овластување да ја блокираат испораката на опрема и со тоа да ја загрозат безбедноста на снабдувањето со енергија на Унгарија во иднина“, рече унгарскиот министер за надворешни работи Петер Сијарто.
Руската нуклеарна енергија не е предмет на санкции и минатиот месец Украина го повика Брисел да ја вклучи во ново ембарго. Унгарија веднаш реагираше – ако дојде до тоа ќе стави вето.
Руската нуклеарна технологија е меѓу водечките во светот, а големите сили се натпреваруваат да развијат понапредни решенија.
САД изградија „мали нуклеарни реактори“
Од Соединетите Американски Држави тврдат дека имаат изум – „мали нуклеарни реактори“ кои можат да се транспортираат со камиони, погодни за обезбедување електрична енергија за поединечни објекти.
„Вашата слика за нуклеарната енергија е џиновски, цилиндрични бетонски разладни кули кои исфрлаат пареа на локација што зафаќа стотици хектари земја. Наскоро ќе има алтернатива“, вели директорот на новите реактори на американскиот Институт за нуклеарна енергија, Марк Никол.
Брет Кугелмас, основач на Last Energy, вели дека цената на испорачаната енергија може да биде значително пониска.
„Микрореакторот“ што го развивме е истата основна технологија, истите материјали што ги гледате како напојуваат 300 електрани ширум светот и придонесуваат за речиси 10 проценти од глобалното производство на електрична енергија. Процесот на изградба е радикално поедноставен и драстично ќе ги намалиме трошоците за испорачана енергија“, вели Кугелмас.
Германија ја продолжи работата на нуклеарните централи
Германија неодамна ги урна кулите на нуклеарниот реактор Библис. Тој беше затворен во 2011 година по катастрофата во Фукушима кога Германија одлучи да ги затвори сите 17 нуклеарни централи.
Енергетската криза ги наруши плановите – преостанатите три реактори требаше да бидат затворени во декември, но нивната работа е продолжена, засега до април.
И додека Германија тврди дека може без нуклеарна енергија, Франција оценува дека електричната енергија од нивните нуклеарни централи во следната деценија ќе биде клучна за европската енергетска безбедност.
