Кредитите од банките за домаќинствата во еврозоната повторно се намалија во декември 2012 година.
Причината за тоа е долготрајната должничка криза во овој регион, која и понатаму ја попречува побарувачката за кредити, соопшти Европската централна банка (ЕЦБ).
Банкарските кредити во еврозоната во приватниот сектор се намалени за 0,7 проценти во декември 2012 година во споредба со истиот месец од претходната година, откако во ноември веќе се намалија за 0,8 проценти, се наведува во соопштението на ЕЦБ.
ЕЦБ веќе долго време укажува дека малиот број на кредити во приватниот сектор го одразува падот на побарувачката за кредити, а не строгите кредитни услови, со оглед на песимистичките економски прогнози.
Според податоците на ЕЦБ, растот на обемот на пари во оптек е забавен во текот на минатиот месец. Индикаторот М3, клучниот показател на инфлациските притисоци во еврозоната, во декември се зголемил за 3,3 проценти во однос на 3,8 проценти во ноември.
