Директорот на американската Централна разузнавачка агенција, Вилијам Барнс, изјави дека следните шест месеци ќе бидат критични за војната во Украина и оти верува дека рускиот претседател Владимир Путин смета на намалениот интерес на Западот за војната во Украина и на политичкиот замор во него, кои ѝ даваат на армијата нова шанса да напредува на бојното поле.
Поранешниот заменик-државен секретар Барнс ова го изјави вчера говорејќи на Универзитетот „Џорџтаун“ и додаде дека западните разузнавачки служби покажале оти Москва не е заинтересирана за мировни преговори иако одвреме-навреме има индиции за спротивното од Русија, пренесува „Си-би-ес њуз“.
„Ние не мислиме дека Путин е сериозен кога зборува за преговори и покрај тоа што понекогаш го слушаме за тоа“, рече Барнс.
Изјавите на шефот на ЦИА, како што анализираат медиумите, доаѓаат во време на сè поинтензивни предупредувања од украинските власти дека Русија се подготвува да почне голема офанзива насочена кон источниот дел на земјата.
Олексеј Данилов, секретар на украинскиот Совет за национална безбедност и одбрана, неодамна изјави дека најтешките борби во Украина допрва доаѓаат и дека следните неколку месеци ќе бидат клучни.
