Инфлацијата во Европската унија и во еврозоната во декември забави втор месец по ред, покажуваат објавените податоци на Евростат. Годишната стапка на инфлација во ЕУ, мерена со хармонизираниот индекс на потрошувачки цени (ХИЦП), во декември изнесуваше 10,4 отсто, што сигнализира повторно забавување на растот на цените, по скокот од 11,1 отсто во ноември.
Во еврозоната падна од 10,1 на 9,2 отсто, ја потврди Евростат проценката од почетокот на месецот. Во октомври цените во двете области пораснаа најсилно откако Евростат ги објави извештаите, за 11,5 отсто во ЕУ и за 10,6 отсто во еврозоната.
Олеснувањето на инфлацијата во еврозоната во декември е одраз на поблаг пораст на цените на енергијата, за 25,5 отсто во споредба со истиот месец во 2021 година, по скокот од 34,9 отсто во ноември, покажуваат пресметките на Евростат. Од друга страна, растот на цените на индустриските производи благо забрза, од 6,1 на 6,4 отсто.
Кога се исклучени свежата храна и енергијата, стапката на инфлација во еврозоната беше 6,9 отсто во декември и беше повисока за 0,3 процентни поени отколку во ноември. На месечна основа, потрошувачките цени во ЕУ во декември паднале за 0,2 отсто, а во еврозоната за 0,4 отсто, пресметале статистичарите.
Унгарија го престигна Балтикот
Во однос на ноември, годишната стапка на инфлација е намалена во декември во 22 земји, а во три од нив е зголемена. Во две земји цените во декември пораснаа со исто темпо како и претходниот месец.
Унгарија забележа највисока годишна стапка на инфлација во декември, од 25 отсто. Следуваат Летонија и Литванија со стапки на инфлација од 20,7 и 20 отсто, соодветно. Блиску е и Естонија, каде што изнесуваше 17,5 отсто.
Во Германија, најголемата европска економија инфлацијата изнесуваше 9,6 отсто. Најслаб раст на потрошувачките цени на годишно ниво во декември забележа и Шпанија од 5,5 отсто. Следеа Луксембург и Франција, каде што забележаа раст од 6,2 и 6,7 отсто, соодветно.
