Американскиот софтверски гигант „Microsoft“ е во преговори да инвестира 10 милијарди долари во „OpenAI“, креаторот на популарниот бот за вештачка интелигенција „ChatGPT“, изјавија за „Bloomberg“ извори запознаени со ова прашање.
Предлогот што се разгледува бара компанијата со седиште во Редмонт да ги вложи парите во текот на неколку години, иако конечните услови би можеле да се променат, рекоа изворите, кои сакаа да останат анонимни. Според нив, двете компании со месеци разговарале за зделката.
„Semafor“ претходно напиша дека потенцијалната инвестиција ќе вклучи и други фирми за ризичен капитал и може да го вреднува „OpenAI“ на околу 29 милијарди долари, изјавија извори за публикацијата. Документите испратени до инвеститорите имаа за цел договорот да се затвори на крајот на 2022-ра година.
Претставниците на „Microsoft“ и „OpenAI“ одбија да коментираат за ова прашање.
„ChatGPT“ порасна во популарност од неговото лансирање кон крајот на ноември, привлекувајќи ги своите први милиони корисници за помалку од една недела. Нејзината имитација на човечки разговор поттикна шпекулации за нејзиниот потенцијал да ги смени професионалните автори, па дури и да ја загрози основната дејност на пребарувачот на „Google“. Организацијата која стои зад услугата, кооснована од Илон Маск и инвеститорот од Силиконската долина Сем Алтман, генерира средства со наплата на програмерите за лиценцирање на технологијата.
Оваа нова технологија е изградена на јазичниот модел „GPT-3“ на „OpenAI“ и доаѓа на крајот на годината во која вештачката интелигенција е меѓу водечките теми во медиумите. Моделот „Dall-E“ на компанијата, кој служи за генерирање слики со преземање пишани инструкции и создавање уметнички дела и други слики, исто така, предизвика широка дебата за влијанието на вештачката интелигенција во креативните индустрии.„ OpenAI“ веќе работи на наследникот „GPT-4“.
„Microsoft“ претходно инвестираше околу 1 милијарда долари во „OpenAI“. Исто така, работи на додавање „ChatGPT“ на својот пребарувач „Bing“, барајќи конкурентска предност со оглед на доминацијата на „Alphabet“ на пазарот на машини за пребарување. Ботот може да одговори на прашања на природен и човечки начин, да води разговор и одговарајќи на последователни прашања за разлика од основниот сет на врски што го обезбедува „Google Search“.
Сепак, загриженоста за точноста на ботот поттикна претпазливост за неговата предвремена употреба, а училиштата во Њујорк дури им забранија на нивните ученици да пристапат до „ChatGPT“. Самиот Алтман вели дека точноста на услугата не е доволно добра за да може целосно да се потпрат на неа.
