Социјалната мрежа „TikTok“ започна со тестирање на новиот режим на приказ на пејзаж со одбрани корисници ширум светот, чија цел е да ја зголеми конкуренцијата со платформи како „YouTube“ со новата функција, пишува „BBC“.
Ова е голема новина во однос на постоечките функционалности, бидејќи оваа социјална мрежа досега користеше само портрет приказ на видео содржина.
Покрај оваа најава, „TikTok“ исто така најави на почетокот на годинава дека ќе овозможи прикажување на видеа долги до 10 минути, што е исто така уште еден чекор напред во редефинирањето на функционалноста, бидејќи до сега видеата траеја максимум 3 минути.
Аналитичарите го оценуваат овој нов потег како дел од стратегијата оваа социјална мрежа поефективно да се натпреварува со „YouTube“ на пазарот и да привлече поголем број корисници.
Најавата доаѓа во време кога „TikTok“ се соочува со проблеми во Америка.
Популарната апликација е можеби најпозната по својот вирален танц и други често комични видеа. Но, „TikTok“ е во сопственост на компанија со седиште во Кина, што предизвика неодамнешна загриженост дека тоа е алатка што може да се користи за цели што и штетат на националната безбедност на САД.
Голем број американски држави – вклучувајќи ги Мериленд, Јужна Дакота, Тексас и други – неодамна ја забранија или блокираа апликацијата на телефоните и другите уреди што ги користат владините работници.
Се зборува и за позначајни активности: Брендан Кар, комесар на Комисијата за комуникации на САД (FCC), неодамна ја повика федералната влада да го забрани „TikTok“, а сенаторот Марко Рубио претстави предлог-закон за да го направи токму тоа.
