Еврокомесарот за даночна политика Алгирдас Семета ја критикуваше австриската политика за тајност на банкарските податоци, наведувајќи дека ЕУ може да се жали поради тоа.
– Држава како што е Австрија не може да дели банкарски информации со САД, а да одбие да ги пружи на своите европски партнери, рече Семета во интервју за австрискиот весник „Стандард“, осврнувајќи се на преговорите меѓу Австрија и САД за автоматска размена на информации за американски граѓани со сметки во австриски банки.
Семета наведува дека ако една членка на ЕУ договара подобри услови за трета земја во однос на партнерите од Унијата, тоа претставува кршење на законот, што може да доведе до приговори од Европската комисија.
