Со избувнувањето на пандемијата, културните институции претрпеа тежок удар, а дури 90 отсто од музеите ширум светот ги затворија вратите за време на кризата. Истражувајќи го влијанието на пандемската криза врз музеите, УНЕСКО, меѓу другото, направи листа на сите музејски институции во светот.
Таа листа откри дека во светот има околу 95.000 музеи, 60 отсто повеќе од 2012 година, а повеќето од нив се наоѓаат на европскиот континент.
Најголем број музеи во однос на бројот на жители има во таканаречените микродржави кои имаат многу мал број жители. Листата ја предводи Андора со 324,7 музеи на милион жители, Сан Марино (323,5) и Монако (192,6).
Најмногу во Црна Гора, најмалку во БиХ
Исланд е на четвртото место во Европа, со 192,6 музеи на милион жители. На високото петто место е Црна Гора. Според евиденцијата на УНЕСКО, оваа земја со 620.000 жители има вкупно 99 музеи, односно 159,2 на милион жители.
Хрватска има 70,2 музеи на милион жители, вкупно 287. Словенија има 45 музеи на милион жители, а Србија 20,6.
Босна и Херцеговина и Северна Македонија спаѓаат во групата земји со најмал број музеи на милион жители. Северна Македонија има вкупно 26 – односно 12,5 музеи на милион жители, додека Босна и Херцеговина има 9,6 музеи на милион жители – вкупно 32.
