Српскиот тенисер Новак Ѓоковиќ потврди дека нема да учествува на претстојното Отворено првенство на САД во Њујорк.
„За жал, нема да се натпреварувам годинава во Њујорк. На сите играчи им посакувам добар турнир“, напиша Ѓоковиќ на социјалните мрежи, неколку часа пред ждрепката за последниот Грен слем во сезоната.
„Им благодарам на навивачите за сета љубов, поддршка и охрабрување. Продолжувам да ја одржувам формата и оптимизмот и се радувам на нови натпревари. Се гледаме наскоро“, додаде српскиот тенисер кој не може да влезе во САД бидејќи не е вакциниран против коронавирусот.
УС Опен започнува во понеделник, а титулата ја брани Русинот Данил Медведев.