29 март, 2024
ПочетнаЕКОНОМИЈАМАКЕДОНИЈАНовоименуваната амбасадорка на Швајцарија во Северна Македонија г-ѓа Вероник Улман, му ги...

Новоименуваната амбасадорка на Швајцарија во Северна Македонија г-ѓа Вероник Улман, му ги предаде акредитивните писма на претседателот Стево Пендаровски

Новоименуваната амбасадорка на Швајцарија во Република Северна Македонија г-ѓа Вероник Улман денес му ги предаде акредитивните писма на претседателот на Северна Македонија Стево Пендаровски.

„Чест ми е што сум акредитирана да служам како амбасадорка на Швајцарија во Северна Македонија и со радост очекувам понатамошно зајакнување на одличните односи меѓу нашите две земји. Како мали повеќејазични земји без излез на море кои споделуваат тесни културни врски и размени преку значителната дијаспора, Северна Македонија и Швајцарија имаат многу заеднички интереси и можности за соработка“, изјави амбасадорката Улман за време на средбата.

„Низ годините успеавме да постигнеме развој на динамични политички односи и како резултат на тоа нашата земја, денес, во Швајцарската Конфедерација гледа голем пријател и искрен сојузник во процесот на остварување на нашите надворешнополитички приоритети. Би сакал во идниот период да ги искористиме сите можности за натамошен развој на економските односи, имајќи го предвид потенцијалот на двете држави“, изјави претседателот Пендаровски за време на церемонијата.

„Еден од најбитните сегменти на билатералните односи се иселениците од Република Северна Македонија во Швајцарија. Нашата многубројна дијаспора е амбасадор на нашата традиција, обичаи и вредности, со што станаа моќен мост на поврзување на двете општества, двете земји. Преку културната, економската и технолошката интеракција и нишките кои ги спојуваат двете земји, стануваат позабележливи и уште подлабоки“, додаде Пендаровски.

Со хуманитарна помош Швајцарија во Северна Македонија е присутна од 1992 година. Дипломатските односи се воспоставија во 1994 година, а Швајцарската амбасада во Скопје беше отворена во 2000 година.

Амбасадорката Улман исто така ќе ја води Швајцарската програма за соработка во Северна Македонија во тесна соработка со Владата и институциите на Северна Македонија, граѓанското општество и приватниот сектор.

Актуелната цел на Швајцарската програма за соработка е унапредување на квалитетот на живот на граѓаните во Северна Македонија преку зајакнување на демократските институции и практики, промовирање одржлив и инклузивен економски раст и заштита на природните ресурси. Швајцарија додава вредност преку експертиза, финансиски средства и конструктивен ангажман со нејзините долгорочни партнери во Северна Македонија. Денес Швајцарија е најголемиот билатерален развоен партнер на Северна Македонија и останува посветена на стабилноста и просперитетот на земјата и нејзините граѓани.

НАЈНОВИ ВЕСТИ

ХОРОСКОП