Американската економија расте малку побрзо отколку што првично се очекуваше во вториот квартал од годината. Нивото на бруто домашниот производ (БДП) е веќе над својот максимум пред пандемијата, во позадина на големите фискални стимули и програмата за вакцинација против Ковид-19, што ги зголеми трошоците.
БДП-то на САД порасна за 6,6% годишно, според конечните податоци на Министерството за трговија на земјата за април-јуни. Ова е ревидирана нагорна проценка на првичните 6,5% пријавени во јули, според „Reuters“.
Сепак, ова е под прогнозите на економистите анкетирани од агенцијата, кои очекуваа растот на БДП-то да достигне 6,7%.
Економијата порасна со стапка од 6,3% во првиот квартал, успевајќи да се опорави од претходните падови.
Нагорната ревизија во текот на последниот квартал одразува многу посилна стапка на потрошувачки трошоци отколку што првично се мислеше. Во тој период, владата исто така исплати еднократни стимулации за домаќинствата со среден и низок приход.
Во исто време, Федералните резерви ја задржаа својата премногу опуштена монетарна политика, оставајќи ги каматните стапки на историски ниско ниво и стимулирајќи ги цените на берзата.
Потрошувачките трошоци, кои сочинуваат повеќе од две третини од американската економија, беа зголемени со програмата за вакцинација, што ја зголеми побарувачката за услуги како што се патувањата, престојот во хотели, јадењето надвор, забавата и многу повеќе.
Но, се чини дека моментумот се забавува на почетокот на третиот квартал среде новиот пик кај пациенти со делта варијантата на коронавирус. Постојаните одложувања во синџирот на снабдување, исто така, предизвикуваат недостаток на стоки и суровини, што пак влијае на продажбата. Според податоците за трошоците за кредитна картичка, плаќањата за летови, крстарења, престојот во хотели и мотели се намалуваат.
Од „Bank of America Securities“ ја намалија својата прогноза за раст на БДП-то за третиот квартал на 4,5% од претходните 7%. Економистите на „Goldman Sachs“ минатата недела исто така ја намалија својата квартална прогноза за раст на 5,5 проценти од 9 проценти.
Сепак, се очекува активноста да се забрза во последните три месеци од годината. Генерално, економистите очекуваат раст од околу 7% за годината, што би било најдобро остварување од 1984-та година.
