Германскиот производител „Audi“ објави фотографии од електричниот автомобил на иднината, кој го доби името „Grand Sphere“. Ова ќе биде еден од „сферичните“ модели на марката, кои се дизајнирани да обезбедат премин во ерата на електрификација.
Компанијата е категорична дека во време на глобална електрификација на автомобилската индустрија, производителите треба да излезат со нови концепти за модели кои ќе ги заменат сегашните возила со мотори со внатрешно согорување.
„Сферичните“ модели на „Audi“ располагаат со минималистички дизајн на ентериерот и екстериерот, како и системи за автономна контрола.
Досега, компанијата од Инголштад откри само некои детали за „Grand Sphere“, модел кој ќе го наследи седанот „А8“ во опсегот на луксузната марка. Поради недостаток на мотор со внатрешно согорување, капакот на идниот модел е помал, но растојанието помеѓу двете оски ќе се одржи. Ова ќе им овозможи на дизајнерите да ја направат внатрешноста на електричното возило попространа.
Според експертите, „Grand Sphere“ ќе има кабина во минималистички стил, како и голем број автономни системи кои ќе го ослободат возачот од потребата да учествува во управувањето со електричниот автомобил. Покрај тоа, „Grand Sphere“ ќе може да се сеќава на преференциите на возачот и патниците, како и автоматски да ги препознава неговите сопственици.
Официјалната премиера на „Audi Grand Sphere“ ќе се одржи на меѓународниот саем за автомобили во Минхен во септември. И следната година компанијата ќе претстави уште два модела од „сферичното“ семејство, од кои првиот ќе биде ниско купе наречено „Sky Sphere“. По него ќе следи мал миниван или голем кросовер со голема стаклена површина наречена „Urban Sphere“.
