Швајцарскиот производител на луксузни часовници „Hublot“, дел од француската групација „LVMH“, очекува приходите од продажба да пораснат од 15 до 20% во 2021-ва година, поддржани од Кина. Прогнозата е по тешката 2020-та година и по предизвикувачкиот почеток на новата година, а веста ја објави лично извршниот директор.
Минатата година приходите од продажба на швајцарската компанија се намалија бидејќи продавниците се затворија поради блокадите за контрола на пандемијата, а туризмот, важен двигател на продажбата во индустријата, пропадна.
Некои компании кои имаат силно присуство во континентална Кина имаат корист од закрепнувањето на побарувачката. Меѓу нив е и „Richemont“, кој се врати на раст во последниот квартал од 2020-та година.
„За „Hublot“, очекуваме 15-20% раст на приходите во оваа година … Во Кина, сè уште имаме голем потенцијал, така што таму очекуваме силен раст од 30-35%“, изјави извршниот директор Рикардо Гвадалупе.
Според него, зголемувањето на приходите во последниот квартал е поголемо од третиот и за „Hublot“ и за целиот бизнис со часовници и накит на „LVMH“. Најголемата групација на луксузни стоки во светот, се очекува да ги објави своите годишни финансиски резултати наскоро.
Гвадалупе вели дека растот е дојден од Кина, а Макао исто така бележи подобрување од октомври. Во Хонг Конг ситуацијата е сè уште покомплицирана поради политичката ситуација, но во Јапонија и на Блискиот исток бизнисот оди добро.
„Западна Европа останува тежок пазар поради недостаток на туристи“, рече Гвадалупе. Продавниците се затворени поради ограничувања од Ковид-19, што влијае на продажбата во Швајцарија, Германија, Холандија и Велика Британија.
Извршниот директор посочува дека брендот сака дополнително да ја поедностави својата дистрибутивна мрежа во текот на следните неколку години и годинава ќе отвори помалку нови продавници во поголемите градови во Кина.