Volkswagen соопшти дека тргнува во ,,конкретни преговори” со ,,останатите потенцијални” локации за изградба на фабрика во Југоисточна Европа. Reuters пренесува дека според инсајдерите, во игра останале Бугарија и Турција, пренесува Deutsche Welle.
Собранието на акционери на Volkswagen кое се одржа денеска (14-ти мај) беше со нетрпение исчекувано и низ Југоисточна Европа. Повеќе земји, вклучувајќи ја и Србија, се надеваа дека ќе привлечат голема инвестиција на автомобилскиот гигант, а ,,победникот” би требало да биде објавен овие денови.
Од Volkswagen соопштиле дека во понеделникот надзорниот и управниот одбор одлучиле да започнат ,,конкретни преговори” за останатите потенцијални локации. Блиски официјални информации нема, а за DW во понеделникот во компанијата кратко е кажано дека и понатаму е на сила нивното соопштение дека конечната одлука не е донесена.
Меѓутоа, агенцијата Reuters, повикувајќи се на инсајдери, пренесува дека во игра останале уште само локации во Бугарија и Турција. Сепак, германската агенција “DPA” таквите информации ги пренесе уште пред еден месец, но не е јасно дали сега Reuters има новa, свежa потврда, наведува DW.
